म्याग्दी, मङ्सिर-६, म्याग्दी जेसीजले जिल्ला स्तरीय अन्तर मा.वि. जेसीजकप फुटवल प्रतियोगिता आयोजना गर्ने भएको छ । यस वर्षको जेसिस कप फुटबल प्रतियोगिता मंसिर २१ गतेदेखि २५ गतेसम्म सञ्चालन हुने भएको छ । ‘खेलाडीको प्रतिभा प्रस्फुटनमा हाम्रो पहल-जेसीजकप फुटवल’ भन्ने मूल नाराका साथ सञ्चालन हुने प्रतियोगिता १९ औँ संस्करणको प्रतियोगिता रहेको छ ।
म्याग्दी जेसीजका शाखा अध्यक्ष विरेन्द्र श्रेष्ठक अनुसार प्रतियोगितालाई सफल रुपमा सम्पन्न गर्नका लागि आर्थिक संकलन, प्रचार प्रसारका काम सुरु गरिएको छ । प्रतियोगितामा बिजेता विद्यालयलाई जेसीजकप रनिङ शिल्ड, ट्रफि, मेडल र प्रमाणपत्र सहित नगद रु ५२ हजार २२२ र उपबिजेतालाई ट्रफि, मेडल र प्रमाणपत्रको साथमा नगद रु ३२ हजार २२२ पुरस्कार प्रदान गरिने प्रतियोगिताका मुल संयोजक कुमार बानियाँले जानकारी दिनुभयो ।
प्रतियोगितामा उत्कृष्ट खेलाडी, गोलरक्षक, डिफेन्डर, स्ट्राइकर, मिडफिल्डर, प्रशिक्षक, सर्वाधिक गोलकर्ता तथा राईजिङ प्लेयरलाई विभिन्न अवार्ड सहित नगद पुरस्कार, ट्रफि, मेडल र प्रमाणपत्र प्रदान गरिने आयोजकले जनाएको छ । अनुशासित टिमलाई नगद रु ७ हजार ७ सय ७७ को साथमा ट्रफि, मेडल र प्रमाणपत्र प्रदान गरिनेछ ।
पत्रकार सम्मलेनमा प्रतियोगिता सञ्चालनको लागि रु ८ लाख ६८ हजार खर्च हुने अनुमान गरिएको बताइएको छ । जेसीजकप फुटवल प्रतियोगिता म्याग्दीमा विद्यालय तहमा हुने चर्चित फुटवल प्रतियोगिताको रुपमा लिने गरिन्छ । यस वर्षको प्रतियोगिताको मुख्य प्रायोजक सन्तोष श्रेष्ठ स्मृति कोष रहेको छ । पत्रकार सम्मलेनमा नेपाल जेसिसका उपाध्यक्ष सुजन बरुवाल, म्याग्दी जेसिसका संस्थापक अध्यक्ष रमेशकुमार श्रेष्ठ र निबर्तमान अध्यक्ष खाम थापा लगायतको उपस्थिति रहेको थियो ।
