म्याग्दी, कार्तिक-२५, ब्रह्माकुमारी ईश्वरीय विश्वविद्यालय शाखा बेनी, म्याग्दीको आयोजनामा बिहीबारदेखि सदरमुकाम बेनीमा श्रीमद्भागवत् गीता ज्ञान महायज्ञ सुरु भएको छ । ब्रह्माकुमारी ईश्वरीय विश्वविद्यालयको निःशुल्क, निस्वार्थ एवं निशर्त सेवा कार्यक्रमअन्तर्गत महायज्ञको व्यवहारिक एवं वैज्ञानिक प्रवचन कार्यक्रम आयोजना गरिएको हो ।
महायज्ञको उद्घाटन गर्दै गण्डकी प्रदेश सरकारका पर्यटन, उद्योग, वाणिज्य तथा आपूर्ति मन्त्री मणिभद्र शर्माले धर्मलाई पर्यटनसँग जोड्नुपर्ने बताउनुभयो । उहाँले धर्मको प्रचारप्रसार सँगसँगै पर्यटनको समेत विकास गर्न सकिने बताउँदै पर्यटन प्रवद्र्धनका लागि धार्मिक क्षेत्रको प्रचारप्रसार तथा संरक्षणमा जोड दिनुपर्ने बताउनुभयो । मानिस एक ठाउँबाट अर्को ठाउँमा जाँदा त्यहाँ आर्थिक गतिविधि हुने भएकाले धार्मिक यात्रा पनि पर्यटन भएको उहाँको भनाइ छ ।
मन्त्री शर्माले ब्रह्माकुमारी ईश्वरीय विश्वविद्यालय तथा राजयोग प्रशिक्षण केन्द्र बेनी म्याग्दीको आश्रम निर्माणका लागि प्रदेश सरकारले आर्थिक सहयोग गर्ने बताउँदै आफूले धर्मलाई पर्यटनसँग जोड्ने धारणा राख्नुभयो । आश्रमलाई व्यवस्थित बनाउन सहयोग जुटाउने बताउँदै उहाले तनाव व्यवस्थापनका लागि योग, ध्यान तथा सकारात्मक सोच र सन्तुलित आहारविहार गर्नेतर्फ जोड दिनुपर्ने बताउनुभयो । धार्मिक एवं पर्यटनको विकासमा प्रदेश सरकारले जोड दिएको भन्दै मन्त्री शर्माले धर्मसँगै पर्यटनको विकासमा आफूले सक्दो सहयोग गर्ने बताउनुभयो ।
महायज्ञ सञ्चालनको उद्देश्यमाथि प्रकाश पार्दै ब्रह्माकुमारी ईश्वरीय विश्वविद्यालय नेपालका महासचिव शैलेसराज बरालले दैनिक जीवनमा बढ्दो तनाव व्यवस्थापन, शान्ति स्थापना र सकारात्मक सोचको विकासका लागि श्रीमद्भागवत् गीता ज्ञान महायज्ञ तथा व्यवहारिक एवं वैज्ञानिक प्रवचन कार्यक्रमले महत्वपूर्ण भूमिका निभाउने अपेक्षा व्यक्त गर्नुभयो । ब्रह्माकुमारी ईश्वरीय विश्वविद्यालयका निर्देशक ब्रह्माकुमारी प्रणिता दिदीले योग, ध्यान र तपस्याले आध्यात्मिक जागृति एवं स्वयंको सत्य पहिचान, तनाव व्यवस्थापन तथा द्वन्द्व न्युनीकरण हुने बताउनुभयो ।
महायज्ञको उद्घाटनसत्रमा गण्डकी प्रदेश सभा सदस्य विनोद केसी, जिल्ला समन्वय समिति म्याग्दीका प्रमुख देवेन्द्रबहादुर केसी, बेनी नगरपालिकाका प्रमुख हरिकुमार श्रेष्ठ तथा आयोजक संस्थाका पदाधिकारीको विशेष उपस्थिति रहेको थियो । ब्रह्माकुमारी ईश्वरीय विश्वविद्यालयका निर्देशक ब्रह्माकुमारी प्रणिता दिदीको अध्यक्षता र ब्रह्माकुमार शिशिर रेग्मीको सञ्चालनमा सम्पन्न कार्यक्रममा धौलागिरि क्षेत्र बागलुङका प्रमुख सावित्री दिदीले स्वागत गर्नुभएको थियो । कार्यक्रममा स्वागत गीत र नृत्य पनि प्रस्तुत गरिएको थियो ।
औपचारिक कार्यक्रम सुरु हुनुपूर्व सदरमुकाम बेनीबजारमा ब्रह्माकुमारी ईश्वरीय विश्वविद्यालय शाखा बेनी, म्याग्दीसहित जिल्लास्थित विभिन्न संघसंस्था, जातजाति, नौमती बाजा र भजनकिर्तनका साथै नाचगान गरेर बजारको परिक्रमा गरिएको थियो । आउँदो सोमबारसम्म म्याग्दीको बेनीस्थित जिल्ला समन्वय समितिको सभाहलमा आयोजना गरिएको महायज्ञमा ब्रह्माकुमारी अप्सरा दिदीले प्रवचन सुनाउने कार्यक्रम रहेको छ ।
