काठमाडौँ, साउन-१२, सिन्धुलीको गोलन्जोर–६ स्थित छेत्पा नजिकको भण्डास बिप्पर कटेरी भन्ने स्थानमा बसोबास गर्दै आएका लोपोन्मुख हायु जातिका उर्मिला हायुको परिवारका सबै सदस्य हराएपछि अहिले स्थानीयबासीदेखि प्रहरी प्रशासनसम्म खोजीमा जुटेका छन्।
गोलन्जोर गाउँपालिका अध्यक्ष शंकरराज बरालका अनुसार उर्मिला हायुको घर एकान्तमा रहेकोले ढिलो गरी जानकारी प्राप्त भएको र घटना हेर्दा शुक्रबार वा शनिबारतिर नै उनीहरू सम्पर्कविहीन भएका हुनसक्छन्। उहाँले भन्नुभयो “सोमबार बिहान मात्र जानकारी पाएको पालिकाले प्रहरीलाई खबर गरेर खोजी सुरु गरेका हौं।”
बरालका अनुसार पालिकाबाट खोजीका लागि कर्मचारीसमेत परिचालन गरिएको छ। जिल्ला प्रहरी कार्यालय सिन्धुलीका प्रमुख एसपी लालध्वज सुवेदीले हायुको घरमा प्रहरी निरीक्षकको नेतृत्वमा टोली खटाइएको जानकारी दिनुभयो। घरमा सामान्य क्षति देखिएको छ। कुखुरा, बाख्रा अलपत्र अवस्थामा भेटिएका छन्, तर कुनै पनि व्यक्ति घरमा छैनन्। हायु परिवारले पाउने सामाजिक सुरक्षा भत्ता लिन कतै गएको त होइन भन्ने विषयमा समेत अनुसन्धान भइरहेको प्रहरीले जनाएको छ। बेपत्ता हुनुअघि घरमै सुँगुर काटेर खाएको पाइएको छ । जिल्ला प्रहरी कार्यालय सिन्धुलीका एसपी लालध्वज सुवेदीकाअनुसार बेपत्ता हायु परिवारले गत बिहीबार (८ साउन) मा घरमै सुँगुर काटेर खाएको पाइएको हो । बेपत्ता परिवारको खोजी कार्य अहिले पनि जारी छ। समाचार श्रोत: अनलाइन खबर
