म्याग्दी, साउन-११, म्याग्दीको अन्नपूर्ण गाउँपालिका र मुस्ताङको थासाङ गाउँपालिकाको सिमानामा रहेको घोप्टेभिरमा सुक्खा पहिरो खस्दा बेनी–जोमसोम सडक अवरुद्ध भएको छ।
आज बिहान करिब ६ बजेतिर खसेको पहिरोका कारण जोमसोम र मुस्ताङसँगको सिधा यातायात सम्पर्क पूर्ण रूपमा टुटेको हो। प्रहरी चौकी घाँसाका प्रमुख प्रहरी सहायक निरीक्षक तेजबहादुर कुमालका अनुसार सडक खुलाउने कार्यमा सडक विभागको डोजर र प्राविधिक टोली खटिएको छ।
सडक अबरुद्ध हुँदा मुस्ताङ भित्रिने र बाहिरिने सवारी साधनहरू म्याग्दीको काभ्रे र घाँसामा रोकिएका छन्। पर्यटकीय जिल्ला मुस्ताङ आवतजावतमा पूर्ण अवरोध आएपछि स्थानीयवासी, व्यवसायी तथा आन्तरिक तथा विदेशी पर्यटकहरू प्रभावित भएका छन्।
यस्तै, पछिल्ला दिनहरूमा देखिएको प्रतिकूल मौसमका कारण पोखरा–जोमसोम हवाई सेवा पनि बन्द रहेको छ, जसले गर्दा विकल्पका रूपमा प्रयोग हुने हवाइ मार्गसमेत ठप्प भएको छ।
स्थानीय प्रशासनले पहिरोको जोखिमलाई ध्यानमा राख्दै यात्रुहरूलाई सुरक्षित स्थानमै रोक्न अनुरोध गरेको छ भने सडक खुलाउने प्रयास तीव्र पारिएको जानकारी दिएको छ।
थप विवरण प्राप्त भएपछि समाचार अपडेट गरिनेछ।
