बेनी, साउन-१०, बेनी नगरपालिका –७, बिरेन्द्रचोकमा सम्पन्न रक्तदान कार्यक्रममा २९ पिन्ट रगत संकलन गरिएको छ। मंगला आमा समूह बेनी म्याग्दीको आयोजनामा र बौद्ध युवा क्लबको संयोजनमा सम्पन्न कार्यक्रम नेपाल रेडक्रस सोसाइटी र रक्तसञ्चार सेवा केन्द्र बेनीको प्राविधिक सहयोगमा सम्पन्न भएको हो।
कार्यक्रमको उद्घाटन बेनी नगरपालिकाका नगरप्रमुख सुरत केसीले गर्नुभयो। उहाँले म्याग्दीमा रगतको अभावकै कारण कसैले ज्यान गुमाउन नपरेको बताउनुभयो। उहाँका अनुसार यहाँ संकलन भएको रगत आवश्यक परे अन्य जिल्लामा समेत पठाउने गरिन्छ।
रेडक्रस म्याग्दीका सभापति अमर बानियाँले रक्तदान कार्यक्रम सराहनीय रहेको उल्लेख गर्दै आगामी दिनमा यस्ता सामाजिक क्रियाकलापलाई निरन्तरता दिनुपर्ने धारणा राख्नुभयो।
मंगला आमा समूहकी अध्यक्ष तकसरा रानाले संस्थाले सामाजिक उत्तरदायित्वलाई उच्च प्राथमिकतामा राख्दै निरन्तर यस्ता कार्यक्रम गर्दै आएको जानकारी दिनुभयो।
रक्तदान कार्यक्रममा स्थानीय युवाहरू, सामाजिक अभियन्ताहरू, स्वयंसेवीहरू तथा रक्तदाताहरूको उल्लेखनीय सहभागिता देखिएको थियो।
म्याग्दीमा पछिल्लो समय रक्तदानप्रतिको आकर्षण उल्लेख्यरूपमा बढ्दो छ। रगतको अभावले बिरामीको उपचारमा समस्या भएको खबर पाएपछि दाताहरू स्वयं रक्तसञ्चार केन्द्रमा पुग्ने गरेका छन्।
