देवी जिसी /बेनी (म्याग्दी), साउन-८, महिला उद्दमी संघ नेपाल, जिल्ला कार्यसमिति म्याग्दीको आयोजनामा सञ्चालन गरिएको तीनदिने निशुल्क ‘सेल्फ मेकअप’ तालिम बिहीबार सम्पन्न भएको छ। तालिम बेनी नगरपालिका वडा नं. ८ को कार्यालयमा सञ्चालन गरिएको हो।
समापन समारोहका प्रमुख अतिथि बेनी नगरपालिकाकी उपप्रमुख ज्योति लामिछानेले महिलालाई आत्मनिर्भर र पेशामुखी बनाउने यस्ता तालिमहरू उपयोगी हुने भन्दै कार्यक्रमको प्रशंसा गर्नुभयो। उहाँले महिलाहरूको आत्मविश्वास अभिवृद्धि र स्वरोजगारका सम्भावनालाई यस्ता तालिमले बल पुर्याउने विश्वास व्यक्त गर्नुभयो।
कार्यक्रमका विशेष अतिथि वडा नं. ८ का अध्यक्ष उत्तम कर्माचार्यले महिला सशक्तिकरणका लागि विभिन्न संघसंस्थाले समाजमा पुर्याउँदै आएको योगदान महत्वपूर्ण रहेको बताउँदै महिला उद्दमी संघको भूमिकाको चर्चा गर्नुभयो।
संघकी अध्यक्ष सोनिया विश्वकर्माले महिलाहरूले आफैं कसरी सुन्दर, आकर्षक र आत्मविश्वासी देखिन सकिन्छ भन्ने कुरामा दक्षता हासिल गराउन तालिम सञ्चालन गरिएको जानकारी दिनुभयो। तीन दिनसम्म सञ्चालन भएको तालिममा सहभागी महिलाहरूले फेशियल, क्लिन्जिङ लगायतका मेकअपसम्बन्धी व्यवहारिक सीपहरू सिकेका थिए।
तालिममा प्रशिक्षकका रूपमा सुनिता जैसी सापकोटा र मैना देवी राईले सहजीकरण गर्नुभएको थियो। तालिममा १५ जना महिलाको सक्रिय सहभागिता रहेको आयोजकले जनाएको छ। समापन कार्यक्रम मीनादेवी राईको अध्यक्षता र सञ्चालन गौमती राम्जालीले गर्नुभएको थियो।
