बेनी, श्रावण -८, करिब २२ वर्षअघि घटेको कर्तव्य ज्यानसम्बन्धी गम्भीर मुद्दामा फरार रहेका अभियुक्त के बहादुर गर्बुजा पक्राउ परेका छन्।
जिल्ला प्रहरी कार्यालय, म्याग्दीका अनुसार वादी भूल बहादुर तिलिजाको जाहेरीका आधारमा साबिकको दग्नाम गा.वि.स. वडा नं. २ (हाल रघुगङ्गा गाउँपालिका) बस्ने धनराम तिलिजामाथि २०६० साल असोज ६ गते राति १२ बजे घरमै सुतिरहेकै अवस्थामा धारिलो हतियार प्रयोग गरी हत्या गरिएको थियो। उक्त घटनामा संलग्न रहेका के बहादुर गर्बुजासहितका व्यक्तिहरूविरुद्ध कर्तव्य ज्यानसम्बन्धी मुद्दा दर्ता गरिएको थियो।
उक्त मुद्दामा जिल्ला अदालत म्याग्दीले २०६८ साल जेठ ११ गते गर्बुजालाई २० वर्ष कैद सजायको फैसला सुनाएको थियो। तर फैसला पछि उनी फरार रहँदै आएका थिए।
२२ वर्षपछि प्रहरीको निगरानी र सूचनाको आधारमा म्याग्दीको रघुगंगा गाउँपालिका–४, दनाममा लुकिछिपी बसेको अवस्थामा के बहादुर गर्बुजालाई २०८२ साल श्रावण ८ गते पक्राउ गर्न प्रहरी सफल भएको हो।
जिल्ला प्रहरी कार्यालय म्याग्दीबाट खटिएको टोलीले उनलाई नियन्त्रणमा लिएर हाल जिल्ला अदालत म्याग्दीमार्फत कैद सजाय भुक्तानको लागि कारागार कार्यालय म्याग्दीमा पठाइएको जिल्ला प्रहरी कार्यालय म्याग्दीका सूचना अधिकारी प्रहरी निरीक्षक सागर पौडेलले जानाकारी दिनुभएको छ ।
