बेनी, साउन-८, म्याग्दी जिल्लामा नेपाल कम्युनिष्ट पार्टीका संस्थापक महासचिव स्वर्गीय पुष्पलालको स्मृति दिवसको अवसरमा विशेष कार्यक्रम सम्पन्न भएको छ। नेकपा एमाले जिल्ला कमिटी म्याग्दीको आयोजनामा बुधबार बेनी सदरमुकामस्थित वीरेन्द्रचोकमा नेपालमा कम्युनिष्ट आन्दोलनसम्बन्धी डकुमेन्ट्री प्रदर्शन गरिएको हो। साँझ साढे छ बजेदेखि सुरु भएको यस कार्यक्रममा करिब चालीस मिनेटको भिडियो डकुमेन्ट्री प्रदर्शन गरिएको थियो।
कार्यक्रममा “दक्षिणपन्थी अवसरवाद र सङ्गठनात्मक अराजकतालाई अन्त्य गरौं, जबजको मार्गदर्शनमा समाजवादको आधार निर्माण गरौं” भन्ने मूल नारा दिइएको थियो।
एमाले म्याग्दीका अध्यक्ष बालकृष्ण सुवेदीले डकुमेन्ट्रीमा कम्युनिष्ट पार्टी स्थापनादेखि हालसम्मका सात दशकका विभिन्न घटना र गतिविधिहरू समावेश गरिएको बताउनुभएको छ । कार्यक्रममा बेनी नगरपालिकाका नगर प्रमुख सुरत केसी, एमाले म्याग्दीका नेता तथा कार्यकर्ताहरूले स्वर्गीय पुष्पलालको तस्विरमा माल्यार्पण गर्नुभएको थियो।
पुष्पलालको जन्म विसं उन्नाइस सय एकासी साल असार पन्ध्र गते रामेछाप जिल्लाको भँगेरीमा भएको थियो। उहाँको नेतृत्वमा विसं दुई हजार छ साल वैशाख दश गते भारतको कोलकतामा नेपाल कम्युनिष्ट पार्टीको स्थापना भएको थियो। विसं २०४५ साउन ७ गते भारतमा उपचारको क्रममा पुष्पलालको निधन भएको थियो। हरेक वर्ष यही दिन उहाँको स्मृति दिवस मनाइन्छ।
