बेनी, साउन-७, नेपाल कम्युनिष्ट पार्टीका संस्थापक स्वर्गीय नेता पुष्पलालको सम्झनामा आज म्याग्दीमा डकुमेन्ट्री प्रदर्शन हुने भएको छ। नेकपा एमाले जिल्ला कमिटी म्याग्दीको आयोजनामा आज पुष्पलाल स्मृति दिवसको अवसरमा नेपालमा कम्युनिष्ट आन्दोलनको डकुमेन्ट्री प्रदर्शन गरिने भएको हो।
‘दक्षिणपन्थी अवसरवाद र सङ्गठनात्मक अराजकतालाई अन्त्य गरौं, जबजको मार्गदर्शनमा समाजवादको आधार निर्माण गरौं’ भन्ने मूल नारासहित म्याग्दी सदरमुकाम बेनीको वीरेन्द्रचोकमा साँझ साढे ६ बजे यो डकुमेन्ट्री प्रदर्शन गरिने तयारी छ।
एमाले म्याग्दीका अध्यक्ष बालकृष्ण सुवेदीका अनुसार पानी परेको अवस्थामा भने जिल्ला समन्वय समितिको सभाहलमा प्रस्तुत गरिनेछ।
नेपालमा कम्युनिष्ट पार्टी स्थापनाको इतिहासदेखि वर्तमानसम्मका गतिविधिसहित तयार गरिएको यो डकुमेन्ट्री अवलोकन गर्न वामपन्थी कम्युनिष्ट र नेपालको कम्युनिष्ट आन्दोलनका जिज्ञासुहरुलाई खुला निमन्त्रणा गरिएको छ।
पुष्पलालको जन्म वि.सं. १९८१ असार १५ गते रामेछाप जिल्लाको भँगेरीमा भएको थियो। उनले २००६ सालमा भारतको कोलकतास्थित श्यामबजारमा नेकपाको स्थापना गरेका थिए।
पुष्पलालको वि.सं. २०३५ साल साउन ७ गते भारतको गोविन्दबल्लभ पन्त अस्पतालमा निधन भएको थियो। नेपालका कम्युनिष्ट पार्टीहरुले हरेक वर्ष यही दिन उनको स्मृति दिवस मनाउने गर्छन्।
