बेनी, साउन-६, मुस्ताङको थासाङ गाउँपालिका–२ स्थित कोवाङ–खन्ती–सौरु–सिर्कुङ जोड्ने निर्माणाधीन झोलुङ्गे पुलबाट कालीगण्डकी नदीमा खसेर घाइते भएका एक युवकलाई हेलिकप्टरमार्फत थप उपचारका लागि पोखरा पठाइएको छ।
थासाङ गाउँपालिका–१ टुकुचेका २० वर्षीय पेम्बा शेर्पा चामलको बोरा बोकेर जाँदै गर्दा पुलबाट खसेर गम्भीर घाइते भएका हुन्। प्रहरी चौकी कोवाङका प्रहरी सहायक निरीक्षक दिलबहादुर भण्डारीको नेतृत्वमा गएको टोलीले शेर्पालाई उद्धार गरी प्राथमिक उपचारपछि मणिपाल अस्पताल पोखरा पठाएको हो।
जिल्ला प्रहरी कार्यालय मुस्ताङका सूचना अधिकारी विकाश अधिकारीका अनुसार शेर्पाको खुट्टामा गम्भीर चोट लागेको छ। हाल उनको अवस्था खतरामुक्त रहेको जनाइएको छ।
बर्खाको समयमा पुलबाट आवतजावत गर्दा मानवीय क्षति हुने जोखिम उच्च हुने भएकाले पुलमा कडाइ गरिएको समेत प्रहरीले जनाएको छ।
