जलजला, साउन-३, पर्वतको जलजला गाउँपालिकामा सञ्चालित लक्षित वर्ग निःशुल्क एम्बुलेन्स सेवा प्रभावकारी बनेको छ। समयमै स्वास्थ्य संस्थामा पु¥याएर धेरैको ज्यान जोगाउन सफल यो सेवा गत आर्थिक वर्षमा मात्रै ६ सय ३१ जनाले उपयोग गरेका छन्।
जसमध्ये ३२७ जनाले पूर्ण रूपमा निःशुल्क सेवा प्राप्त गरेका हुन्। गाउँपालिकाका अनुसार सेवा लिनेहरुमध्ये: ७० जना गर्भवती तथा सुत्केरी महिला, ९९ जना ज्येष्ठ नागरिक, ११० जना गरिब तथा असहाय, ५ जना अपाङ्गता भएका व्यक्ति र अन्य ४३ जना रहेका छन्।
गाउँपालिका अध्यक्ष राजुप्रसाद आचार्यका अनुसार, एम्बुलेन्स सेवा अत्यन्त प्रभावकारी देखिएको छ। “समयमै उद्धार हुन सकेको छ, धेरैको ज्यान जोगिएको छ,” भन्दै उहाँले आगामी दिनमा यो सेवा अझ प्रभावकारी बनाइने प्रतिवद्धता व्यक्त गर्नुभयो। लक्षित वर्गबाहेक अन्य नागरिकले सुलभ शुल्कमा सेवा लिँदा गाउँपालिकाले ११ लाख ३ हजार ६२३ रुपैयाँ राजस्व संकलन गर्न सफल भएको छ।
एम्बुलेन्स सेवा अन्तर्गत हालसम्म ३०४ जनाले सःशुल्क सेवा लिएका छन्। बेनी अस्पताल, धौलागिरी अञ्चल अस्पताल, पर्वत अस्पताल हुँदै पोखरा र काठमाडौँसम्म एम्बुलेन्स सेवा पुर्याइएको गाउँपालिकाले जनाएको छ।
गाउँपालिकाका प्रमुख प्रशासकीय अधिकृत हरिकृष्ण आचार्यले एम्बुलेन्स सेवाले गर्भजाँच, सुरक्षित प्रसूति सेवा र अन्य आकस्मिक स्वास्थ्य सेवा सुलभ गराएको भन्दै मातृशिशु मृत्युदर घटाउन सहयोग पुगेको बताउनुभयो।
सेवा सञ्चालनका लागि प्रवासी नाग्लीवाङवासीको सहयोगमा खरिद गरिएको ग १ झ ६१६ नम्बरको एम्बुलेन्स र भारतीय दूतावासले प्रदान गरेको ध १ झ ३७ नम्बरको एम्बुलेन्स परिचालित छन्। त्यसैगरी एम्बुलेन्स सेवा व्यवस्थापनका लागि छुट्टै समिति र बैंक खाता सञ्चालन गरिएको छ। २४ सै घण्टा सेवा उपलब्ध हुने गरी निःशुल्क टोल–फ्रि नम्बर १८१०५०००१६८ मा सम्पर्क गरेर सेवा लिन सकिने व्यवस्था गरिएको छ।
