म्याग्दी, साउन-३, डिभिजन वन कार्यालय म्याग्दीले आर्थिक वर्ष २०८१/८२ का लागि जिल्लाका उत्कृष्ट तीन सामुदायिक वन उपभोक्ता समूहलाई शुक्रबार पुरस्कृत गरेको छ ।
पुरस्कृत हुनेमा प्रथम स्थानमा मालिका गाउँपालिका–६ दरबाङको भगवती सामुदायिक वन उपभोक्ता समूह, द्वितीय स्थानमा बेनी नगरपालिका–७ र ८ स्थित बराहपाखो सामुदायिक वन उपभोक्ता समूह, र तृतीय स्थानमा रघुगंगा गाउँपालिका–२ राखुभगवतीको जनहित सामुदायिक वन उपभोक्ता समूह रहेका छन् ।
यी समूहहरुलाई क्रमशः नगद १० हजार, ७ हजार ५ सय, र ५ हजार रुपैयाँ, दोसल्ला र प्रमाणपत्र प्रदान गरिएको हो।
यसैक्रममा, उत्कृष्ट कर्मचारीतर्फ डिभिजन वन कार्यालय म्याग्दीमा कार्यरत लेखापाल भीष्म थापा र वन तथा वातावरण संरक्षणका क्षेत्रमा पत्रकारितामार्फत सकारात्मक भूमिका निर्वाह गरेको भन्दै रुप्से दैनिकका सह–सम्पादक तथा नेपाल पत्रकार महासंघ म्याग्दी शाखाका सह–सचिव प्रताप बानियाँलाई पनि सम्मान गरिएको छ।
पुरस्कृतहरुलाई डिभिजनल वन अधिकृत विष्णुप्रसाद अधिकारी, वन अधिकृत चन्द्रमणि सापकोटा, र खरिदार गोविन्दप्रसाद सुवेदीले दोसल्ला ओढाएर नगद र प्रमाणपत्र प्रदान गर्नुभएको थियो।
कार्यक्रममा डिभिजनल वन अधिकृत विष्णुप्रसाद अधिकारीले सामुदायिक वनको संरक्षण र सम्बर्धनमा समुदायको सक्रिय भूमिका अत्यन्त सराहनीय भएको भन्दै सम्मान कार्यक्रमलाई आगामी दिनमा पनि निरन्तरता दिने बताउनुभयो।
वन अधिकृत चन्द्रमणि सापकोटाले वन, वन्यजन्तु र पर्यावरण संरक्षणका लागि सबैको सामूहिक प्रयास जरुरी रहेको उल्लेख गर्नुभयो।
कार्यक्रम सञ्चालन खरिदार गोविन्द सुवेदीले गर्नुभएको थियो भने बराहपाखो सामुदायिक वनका अध्यक्ष विष्णु गौतमले सम्मानप्रति आभार व्यक्त गर्नुभएको थियो।
डिभिजन वन कार्यालयका अनुसार म्याग्दीमा हाल ३११ वटा सामुदायिक वन, २ वटा धार्मिक वन र १ कबुलियत वन रहेका छन्।
‘हरियो वन, नेपालको धन’ भन्ने नारासँगै वन क्षेत्र समुदायलाई हस्तान्तरण भएपछि उपभोक्ता समूहहरु सशक्त बन्दै गएका छन्। यद्यपि, पछिल्लो समयमा आगलागी र डढेलोका घटना बढ्दै गएकोले सबैलाई सचेत रहनुपर्नेमा वन कार्यालयले आग्रह गरेको छ।
