देवी जिसी/बेनी, साउन-१, बेनी नगरपालिकाले चालु आर्थिक वर्ष २०८१/८२ को तेस्रो चौमासिक अवधिसम्मको सार्वजनिक सेवा र विकास निर्माणको प्रगति विवरण सार्वजनिक गरेको छ। नगरपालिकाको आयोजनामा बुधबार सदरमुकाम बेनीमा सम्पन्न सार्वजनिक सुनुवाइ कार्यक्रममा पूँजीगत बजेटतर्फ ८३ दशमलव ९९ प्रतिशत बजेट खर्च भएको जानकारी गराइएको हो।
कार्यक्रममा प्रमुख प्रशासकीय अधिकृत अर्जुन शर्माले आर्थिक, सामाजिक, पूर्वाधार विकास लगायतका क्षेत्रमा खर्च विवरण प्रस्तुत गर्नुभयो। उहाँका अनुसार आर्थिक विकास क्षेत्रमा ७९.५२, सामाजिक विकासमा ९२.२, पूर्वाधार विकासमा ८६.२३, सुशासनमा ८२.६९ र कार्यालय सञ्चालनमा ८६.७५ प्रतिशत बजेट खर्च गरिएको छ। चालुतर्फ ८७.८२ प्रतिशत बजेट खर्च भएको छ भने ८१.५५ प्रतिशत राजस्व संकलन गरिएको उल्लेख गरिएको छ। नगरपालिकाले चारवटा नदीवाट बालुवा, गिट्टी लगायतका पदार्थ उत्खनन् गरी ठेक्काबाट राजस्व संकलन गरेको भए पनि पाँच वटा बगरको ठेक्का नपरेको जानकारी गराइएको छ।
कार्यक्रममा सहभागी स्थानीयवासीले कृषि तथा पशुपालनमा बजेट कम भएको, सिङ्गाको कोल्ड स्टोर प्रयोगमा नआएको, हस्पिटलचोक–माथिल्लो क्षेत्रको सडक स्तरोन्नति, मङ्गलाघाट क्षेत्रको फोहोरमैला व्यवस्थापन, सामुदायिक कुकुरको नियन्त्रण, टोल विकास संस्थालाई आर्थिक सहयोग, बाबुआमाको ठेगान नभएका बालबालिकालाई नागरिकता दिने व्यवस्था, विपन्न परिवारलाई परिचयपत्र वितरण, टेम्पोको भाडादर समायोजन, राष्ट्रिय परिचयपत्र वितरणमा ढिलाइ, तातोपानी क्षेत्रमा सिसीटिभी जडान, बाँदर आतङ्क नियन्त्रण र रावणपार्कलाई आम्दानीको स्रोतका रूपमा विकास गर्नुपर्ने लगायतका सरोकार राखेका थिए।
सवाल–जवाफ तथा सुझाव कार्यक्रममा तिलक गुरुङ, लक्ष्मीकुमारी जोशी, तेजेन्द्रबहादुर जिसी, रसिला परियार, विनोदकुमार श्रेष्ठ, तप्तबहादुर विश्वकर्मा, प्रकाश रेग्मी, देवी जिसी, धनकुमारी किसानलगायतले आ–आफ्ना जिज्ञासा राख्नुभएको थियो।
सार्वजनिक सुनुवाइ कार्यक्रममा उठेका प्रश्न र सुझावको जवाफ नगर प्रमुख सुरत केसी, प्रमुख प्रशासकीय अधिकृत अर्जुन शर्मा, सहायक प्रमुख जिल्ला अधिकारी अनिशा आचार्य, मालपोत अधिकृत साधनाकुमारी श्रेष्ठ, नापी कार्यालय प्रमुख तुलसीप्रसाद सुवेदी, डिभिजन वन कार्यालयका प्रतिनिधि शान्ति शाही लगायत सम्बन्धित निकायका अधिकारीहरूले दिनुभएको थियो।
कार्यक्रममा नेपाली कांग्रेस, नेकपा एमाले, माओवादी केन्द्रका नगर तहका नेताहरु तथा म्याग्दी उद्योग वाणिज्य संघका प्रतिनिधिहरुले दीगो, रणनीतिक र गौरवका योजनाहरु कार्यान्वयन गर्न सुझाव दिएका थिए।
सार्वजनिक सुनुवाइ कार्यक्रम बेनी नगरपालिकाका उपप्रमुख ज्योति लामिछानेको स्वागत मन्तव्य र वरिष्ठ प्रशासकीय अधिकृत युवराज थापाको सञ्चालनमा सम्पन्न भएको थियो। कार्यक्रमको सहजीकरण नेपाल पत्रकार महासंघ म्याग्दीका अध्यक्ष हरिकृष्ण गौतम र सहसचिव प्रताप बानियाँले गर्नुभएको थियो।
