देवी जिसी/ म्याग्दी, असार-२६, चालु आर्थिक वर्ष २०८१/०८२ मा प्रदेश जनस्वास्थ्य कार्यालय म्याग्दीमार्फत सञ्चालित कार्यक्रमहरुको वार्षिक प्रगति समीक्षा कार्यक्रम सम्पन्न भएको छ।
बुधवार, सदरमुकाम बेनीमा सरोकारवालाहरुको उपस्थितिमा सम्पन्न कार्यक्रममा कार्यालय प्रमुख भूवन ठकुराठीले विभिन्न कार्यक्रमहरुको समीक्षा गर्दै ९८ प्रतिशत भौतिक प्रगति र ६८ प्रतिशत वित्तीय प्रगति हासिल गरिएको जानकारी दिनुभयो।
उहाँका अनुसार बाल स्वास्थ्य कार्यक्रम अन्तर्गत म्याग्दी जिल्लालाई पूर्णखोप सुनिश्चितता तथा दीगोपना कायम जिल्ला घोषणा गरिएको छ। साथै, एचपिभी खोप अभियान, नियमित खोपको सुरुआत, खोप पुनर्ताजगी तालिम, पोषण समीक्षा तथा ५ वर्ष मुनिका बालबालिकाको पोषण अवस्था लेखाजोखा, बालरोग व्यवस्थापन तालिमजस्ता कार्यक्रमहरू पनि प्रभावकारी रुपमा सञ्चालन गरिएको जनाइएको छ।
त्यसैगरी सुरक्षित मातृत्व प्रवर्द्धन गर्दै मातृ तथा नवशिशु स्वास्थ्य सम्बन्धी अनसाइट कोचिङलगायत विविध कार्यक्रमहरू सफलतापूर्वक सञ्चालन गरिएको बताइएको छ।
कार्यक्रममा रोग नियन्त्रण, उपचार सेवा, स्वास्थ्य व्यवस्थापन, परिवार नियोजन तथा मानसिक स्वास्थ्य कार्यक्रमसमेत सञ्चालन गरिएको थियो। यस आर्थिक वर्षमा म्याग्दी जिल्लाले पूर्णखोप सुनिश्चितता जिल्ला घोषणा गरेर गण्डकी प्रदेशमै पहिलो स्थान प्राप्त गरेको उल्लेख गरिएको छ।
कार्यक्रमको अवसरमा सूर्ति तथा मदिराजन्य पदार्थ नियन्त्रण तथा नियमन सम्बन्धी सरोकारवालाबीच समन्वयात्मक बैठक पनि सम्पन्न गरिएको थियो।
बैठकमा जिल्ला सरकारी वकिल कार्यालय म्याग्दीका जिल्ला न्यायाधिवक्ता गोविन्द उपाध्यायले सूर्ति तथा मदिराजन्य पदार्थ नियन्त्रणसम्बन्धी कानुनी व्यवस्था र ऐनहरूको बारेमा सहजीकरण गर्नुभएको थियो।
कार्यक्रममा गण्डकी प्रदेशको सूर्तिजन्य पदार्थ नियमन तथा नियन्त्रण गर्ने ऐन २०७६, सूर्तिजन्य पदार्थ नियन्त्रण निर्देशिका २०७१, मदिरा ऐन २०३१ लगायतका कानुनी प्रावधानबारे पनि जानकारी गराइएको थियो।
कार्यक्रम जिल्ला समन्वय समिति म्याग्दीकी कार्यवाहक प्रमुख डिलकुमारी खत्री स्वास्थ्य कार्यालय म्याग्दीका प्रमुख भूवन ठकुराठीको अध्यक्षता र सूचना अधिकारी गणेश सुवेदीको सञ्चालनमा सम्पन्न भएको थियो।
त्यसैगरी, बेनी नगरपालिकाका नगर प्रमुख सुरत केसी, प्रमुख जिल्ला अधिकारी गुरुदत्त ढकाल, प्रहरी नायव उपरीक्षक सूर्यबहादुर थापा, सशस्त्र प्रहरी बल गलेश्वरका प्रहरी नायव उपरीक्षक नवराज नेपाल, राष्ट्रिय अनुसन्धान जिल्ला कार्यालयका प्रमुख विजय पौडेल, नेपाल पत्रकार महासंघ म्याग्दी शाखाका अध्यक्ष हरिकृष्ण गौतमलगायत विभिन्न सरकारी कार्यालयका प्रमुख तथा सञ्चारकर्मीहरूको पनि विशेष उपस्थिति रहेको थियो।
