काठमाडौँ, जेठ-२९, देशको पूर्वी भागमा झन्डै दुई हप्तादेखि अड्किएको मनसुन आज पश्चिमतर्फ अघि बढेको छ। जेठ १५ गते राति कोशी प्रदेशमा प्रवेश गरेको मनसुन केही दिन वर्षा गराएपछि शिथिल बनेको थियो। एक हप्ताभन्दा लामो समय निष्क्रिय रहेको यो मनसुन हिजो साँझदेखि फेरि सक्रिय भएको हो।
आजको अवस्थामा मनसुन कोशीको सम्पूर्ण भूभागमा फैलिएको छ। यसले मधेश र बागमती प्रदेश पार गरेर गण्डकी प्रदेशका केही भागसम्म पुगेको छ।
मौसम पूर्वानुमान महाशाखाका मौसमविद् गोविन्द झाका अनुसार, मनसुन सक्रिय भएर अघि बढिरहेकोले केही दिनमै सम्पूर्ण देशमा फैलने सम्भावना छ।
आजको मौसम अपडेटमा – आज राति कोशी, बागमती र गण्डकी प्रदेशका पहाडी भेगका केही ठाउँमा भारी वर्षाको सम्भावना रहेको छ।
काठमाण्डौ उपत्यकासहित पूर्वी भागमा मनसुन र पश्चिमी भागमा पश्चिमी वायुको प्रभावले आज देशका धेरै ठाउँमा वर्षा भएको छ। यी दुवै प्रणाली भेट भएर कतिपय ठाउँमा भारी वर्षा पनि भएको छ।
जल तथा मौसम विज्ञान विभागको तथ्याङ्कअनुसार, पछिल्लो तीन घण्टामा बर्दियाको मानपुरमा करिब ६० मिलिमिटर वर्षा भएको छ। त्यसैगरी इलामको माइपोखरीमा पछिल्लो ६ घण्टामा ५० मिलिमिटरभन्दा बढी पानी परेको छ।
पछिल्लो १२ घण्टाको रिपोर्टमा, गण्डकी प्रदेशको हिमाली क्षेत्र, कर्णाली र सुदूरपश्चिम प्रदेशका केही पहाडी तथा हिमाली भागबाहेक अन्य धेरै ठाउँमा वर्षा भएको छ। देशका अधिकांश भागमा बादल लागेको छ।
बाढी पूर्वानुमान महाशाखाले सूचना जारी गरेर बर्दियाको मानपुर र वरपरका क्षेत्रमा बाढीको जोखिम रहेको भन्दै सतर्कता अपनाउन आग्रह गरेको छ।
