बेनी, बैशाख-२३, म्याग्दीको रघुगंगा गाउँपालिका-५, झिँमा नवनिर्मित वडा कार्यालय भवनको सोमबार एक भव्य समारोहबीच उद्घाटन गरिएको छ। गाउँपालिका अध्यक्ष भवबहादुर भण्डारीले उक्त दुई तले भवनको उद्घाटन गर्नुभएको हो।
संघ, स्थानीय सरकार र स्थानीयबासीको संयुक्त लगानीमा करिब २ करोड ६० लाख रुपैयाँमा निर्माण भएको यस भवनमा एक सभाहल र पाँच वटा कोठाका साथै शौचालय र बाथरुम समेत रहेका छन्। गाउँपालिकाका प्रमुख प्रशासकीय अधिकृत चेतनारायण भण्डारीका अनुसार भवन निर्माणमा गाउँपालिका र संघीय सरकारबाट १ करोड ५१ लाख १७ हजार बढी लगानी भएको छ।
भवन निर्माणको लागि आवश्यक जग्गा खरिदमा ५९ लाख र घेराबार, पर्खाल तथा मैदान निर्माणमा २७ लाख रुपैयाँ खर्च भएको छ। भवनको पहिलो तला स्थानीय उपभोक्ता समितिले अघिल्लो आर्थिक वर्षमा निर्माण गरेको थियो भने सभाहल सहितको दोस्रो तला शंकर निर्माण सेवा कम्पनीले यस आर्थिक वर्षमा निर्माण गरेको हो। भवनमा सोलार र विद्युत जडान गरिएको छ।
गाउँपालिका अध्यक्ष भण्डारीले भवन निर्माण भएपछि वडाबासी र कार्यालय सञ्चालनमा सहज हुने बताए। उनका अनुसार, रघुगङ्गाका ८ वडामध्ये हालसम्म वडा नम्बर १, २, ५ र ६ को आफ्नै भवन निर्माण भएका छन्। वडा नम्बर ७ को जग्गा व्यवस्थापन भइसकेको र भवन निर्माणको लागि बजेट माग गरिएको उनले जानकारी दिए।
वडा अध्यक्ष मनबहादुर शेरमन्जाले यसअघि भाडाको घरमा कार्यालय सञ्चालन हुँदै आएकोमा अब भवन निर्माण भएपछि वडा कार्यालय सञ्चालन र सेवा प्रवाहमा सहज हुने बताए। स्थानीय विष्णुप्रसाद शेरचनले साढे तीन रोपनी जग्गा सहुलियत मूल्यमा उपलब्ध गराएका थिए। जग्गा व्यवस्थापन प्रक्रियामा साविक झिँ गाविसका ९ वटै वडाका समूहले एक-एक लाख रुपैयाँका दरले सहयोग गरेको वडा अध्यक्ष शेरमन्जाले जानकारी दिए।
कार्यक्रममा गाउँपालिका उपाध्यक्ष प्रेमकुमारी पुन, अन्य वडाका अध्यक्षहरू, महेन्द्र माविका प्रअ यामबहादुर शेरपुञ्जा लगायतले मन्तव्य राखेका थिए। कार्यक्रममा सहुलियत मूल्यमा जग्गादान गर्ने समाजसेवी शेरचन, निवर्तमान वडा सदस्यहरू र निर्माण उपभोक्ता समिति लगायत सहयोगीहरूलाई सम्मान गरिएको थियो। स्थानीयले नृत्य, नौमती बाजा, पुर्ख्यौली र भजन प्रस्तुत गरेका थिए।
