देवी जिसी /धवलागिरि, बैशाख-२२, म्याग्दीको धवलागिरि गाउँपालिका-२ लुलाङमा २० वर्ष उमेर पुगेपछि विवाह गरेका नवदम्पतीलाई सम्मान गरिएको छ। गाउँपालिकाका २१ वर्षीया पवित्र कुमाई र २७ वर्षीय टकप्रसाद रसाईलीलाई बालविवाह न्यूनीकरणमा प्रेरणादायी भूमिका निर्वाह गरेको भन्दै संगम म्याग्दीले सम्मान गरेको हो। विवाहित जोडीलाई धौलागिरि गाउँपालिका वडा नं. २ का अध्यक्ष अकप्रसाद वि.क. र वडा नं. २ का दलित महिला सदस्य दिलमाया विकले सम्मानपत्र प्रदान गर्दै बधाई तथा सफल दाम्पत्य जीवनको शुभकामना दिनुभएको थियो।
गर्ल्स फस्ट फण्डको आर्थिक सहयोगमा संगम म्याग्दीद्वारा धवलागिरि गाउँपालिकाको समन्वयमा वडा नं. २, ३, ४ र ७ मा बालविवाह न्यूनीकरण परियोजना सञ्चालन हुँदै आइरहेको छ। यसै क्रममा बालविवाह, बाल यौन हिंसा, बालबालिकाप्रति हुने भेदभाव तथा समाजमा हुने विभिन्न समस्याहरूलाई निराकरण गर्ने उद्देश्यले वडा नं. २ मा दलित महिला सदस्य दिलमाया विकको संयोजकत्वमा ९ सदस्यीय बाल सचेतना केन्द्र (CAC) गठन गरिएको छ।
सोही समूहका सदस्यहरूको नेतृत्वमा आयोजित कार्यक्रममा २० वर्ष पूरा भएपछि विवाह गरेका दम्पतीलाई सम्मान गरिएको हो। वडा सदस्य दिलमाया वि.क.का अनुसार यस सम्मान कार्यक्रमले अन्य किशोरकिशोरीहरूमा सकारात्मक प्रभाव पार्नेछ।
उनले संगम म्याग्दीले बालविवाह न्यूनीकरण सम्बन्धी धेरै सचेतनामूलक कार्यक्रम सञ्चालन गरिरहेको र पहिलेको तुलनामा बालविवाह केही हदसम्म कम हुँदै गएको बताउनुभयो । “बालविवाह न्यूनीकरण गर्न सहज छैन, तैपनि प्रगति भइरहेको छ,” उहाँले भन्नुभयो । दिलमायाले आगामी दिनमा पनि यस्ता कार्यक्रमलाई निरन्तरता दिने जानकारी दिनुभयो ।
बालविवाह, बाल यौन हिंसा, बालबालिकाप्रति हुने भेदभाव लगायत समाजमा हुने विभिन्न समस्याहरू निराकरण गर्ने उद्देश्यले यस्ता कार्यक्रम आयोजना गरिएको संगम म्याग्दीले जनाएको छ।
