बेनी, बैशाख-११, ‘पूर्णखोप, सुरक्षित भविष्य’ भन्ने मूल नारासहित म्याग्दीको मंगला गाउँपालिका पूर्णखोप सुनिश्चितता एवं दिगोपना पालिकाको रुपमा घोषित भएको छ । बुधवार पालिकाको केन्द्र बाबियाचौरमा आयोजित एक समारोहबीच मंगला गाउँपालिकालाई पूर्णखोप सुनिश्चित पालिका घोषणा गरिएको हो । बच्चा जन्मेदेखि १५ महिनासम्मका १ सय ६८ जना र १६ महिनादेखि २७ महिनासम्मका २ सय ११ जनासहित सबै बालबालिकाहरुले पूर्णखोप पाएको सुनिश्चितासहित गाउँपालिकालाई पूर्ण खोपको दिगोपना कायम राख्ने प्रतिबद्धता जनाउँदै पूर्णखोप सुनिश्चित दिगोपना पालिका घोषणा गरिएको छ ।
बालबालिकाहरुले जन्मेदेखि २७ महिनासम्म विभिन्न प्रकारका खोपहरु पाएका छन् । राष्ट्रिय खोप तालिकाअनुसार तोकिएका उमेर समूहका बालबालिकाहरुले सम्पूर्ण खोपको मात्रा पुरा गरेको तथा खोप निर्देशिकाअनुसार आवश्यक सबै प्रक्रियाहरु पुरा गरी गाउँपालिकालाई पूर्णखोप सुनिश्चितता दिगोपना पालिका घोषणा गरिएको स्वास्थ्य शाखा प्रमुख बालकृष्ण शर्माले बताउनुभयो । उहाँका अनुसार बालबालिकाहरुले जन्मेपश्चात् पोलियो, दादुरा, हेपाटाईटिस, जापानीज ईन्सेफ्लाईटिस, रुबेला, झाडापखाला, टाईफाइडलगायत रोगविरुद्ध पाउनुपर्ने विभिन्न १३ प्रकारका खोपको सबै मात्रा पुरा गरेका छन् ।
मंगला गाउँपालिकालाई पूर्णखोप सुनिश्चितता पालिकाको रुपमा घोषणा गर्न यसअघि गएको चैत २६ गते ४ नम्बर वडा बराङ्जाबाट वडास्तरमा पूर्णखोप सुनिश्चित वडा घोषणा कार्यको सुरुवात गरिएको थियो । पालिकाको सबै घरधुरीमा सर्वेक्षणसहित ५९ महिनासम्मका सबै बालबालिकाहरुको विवरण सङ्कलन गरी उनीहरुलाई पूर्णखोप लगाउनुका साथै पुनः सर्भेक्षण समेत गरिएको थियो । कुहुँ, बाबियाचौर, बराङ्जा ३ र ४ तथा अर्मनसहित ५ वटा वडा रहेको मंगलामा यी सबै वडालाई पूर्णखोप सुनिश्चितता एवं दिगोपना घोषणा गरिसकेपछि बुधवार पालिकालाई औपचारिक रुपमा पूर्णखोप सुनिश्चितता भएको पालिका घोषणा गरिएको हो । पूर्णखोप सुनिश्चितता पालिका घोषणा समारोहको उद्घाटन गर्दै म्याग्दीका जिल्ला समन्वय अधिकारी कमलप्रसाद आर्चाले पूर्णखोप कार्यक्रमले औषत आयु बढाउने र बाल मृत्युदर घटाउनमा महत्वपूर्ण सहयोग पु¥याउने बताउनुभयो ।
म्याग्दीमा रहेका स्थानीय तहहरुलाई चरणबद्ध रुपमा पूर्णखोप सुनिश्चितता एवं दिगोपना पालिकाको रुपमा घोषणा गर्ने गरिएको बताउँदै उहाँले नागरिकको स्वास्थ्यसम्बन्धी अधिकारलाई राज्यले संविधानमा सुनिश्चित गरेको बताउनुभयो । उहाँले पूर्णखोप पाउनुपर्ने बालबालिकाहरुको मौलिक अधिकारसँग जोडिएको भन्दै स्वस्थ, सक्षम र सबल नागरिक उत्पादनमा मानसिक र शारिरीक विकास गर्न खोपको महत्व रहेकोमा जोड दिनुभयो ।
प्रदेश जनस्वास्थ्य कार्यालय म्याग्दीका प्रमुख भुवन ठकुराठीले खोप कार्यक्रमलाई एकसय रुपैयाँ लगानी गरेमा त्यसको प्रतिफल १६ सय आउने विभिन्न अध्ययनहरुले देखाएको बताउनुभयो । स्थानीय पालिकालाई पूर्णखोप सुनिश्चितता र दिगोपना घोषणा गर्ने कार्य वार्षिक कार्यक्रम भएकाले यसलाई निरन्तरतासहित पूर्णखोप अभियानलाई सफल र प्रभावकारी बनाउनुपर्ने उहाँको भनाइ छ । मंगला गाउँपालिकाका अध्यक्ष सतप्रसाद रोकाले महामारीजन्य विभिन्न प्रकोपबाट बच्नको लागि पनि पूर्णखोप कार्यक्रम प्रभावकारी बन्नुपर्ने बताउनुभयो ।
मंगला–४ नम्बर वडा बराङ्जाका अध्यक्ष लालबहादुर रोकाले मन्तव्य व्यक्त गर्नुभएको कार्यक्रम २ नं वडा बाबियाचौरका अध्यक्ष धनबहादुर खाती क्षत्रीको स्वागत र गाउँपालिकाको रोजगार सहायक ज्ञानेन्द्र आचार्यको सञ्चालनमा सम्पन्न भएको थियो । मंगला गाउँपालिका म्याग्दीमा तेस्रो र गण्डकी प्रदेशमा चौथो पालिकाको रुपमा पूर्णखोप सुनिश्चितता एवं दिगोपना घोषित भएको छ ।
