म्याग्दी, बैशाख-४, चालु आर्थिक वर्ष २०८१/०८२ मा बेनी नगरपालिकाले सबैभन्दा बढी बजेट विनियोजन गरेको बेनी–अर्थुङ्गे–तोरीपानी–पाखापानी सडक योजना निर्धारित समयभन्दा तीन महिना अगावै सम्पन्न भएको छ।
संघीय सरकारको समपुरक अनुदानबाट रु. १ करोड ५० लाख र बेनी नगरपालिकाबाट रु. १ करोड ५० लाख गरी कुल रु. ३ करोडको लागतमा निर्माण गरिएको यो योजना जिल्लाको प्राथमिकतामा परेको हो। यो सडक बेनी नगरपालिका वडा नं. ५, ६, ९, १० र रघुगङ्गा गाउँपालिका वडा नं. ५, ६, ८ का बासिन्दाले प्रयोग गर्ने दैनिक जीवनमा महत्वपूर्ण मार्ग बनेको छ।
निर्माण सामग्रीको मूल्यवृद्धि, बजेट अभाव, आर्थिक संकटजस्ता कारणले धेरै पूर्वाधार योजना प्रभावित भइरहेका बेला विकेश–दुप्चेश्वर–सुभम् जेभीले जिम्मा लिएको यस योजना ६ महिनामा सम्पन्न गर्ने लक्ष्य राखिएको थियो। तर, उल्लेखनीय रूपमा कम्पनीले तीन महिनामै कार्य सम्पन्न गरेको हो। ठेक्का सम्झौता गत पुष १९ गते रु. २ करोड ९ लाखमा भएको थियो भने कार्य सम्पन्नको म्याद आगामी असार २५ गतेसम्म तोकिएको थियो।
मंगलबार नगर उपप्रमुख तथा योजना अनुगमन समितिका संयोजक ज्योती लामिछानेको नेतृत्वमा जनप्रतिनिधि, प्राविधिक तथा कर्मचारीहरुको टोलीले योजना स्थलको निरीक्षण गरेको थियो। उपप्रमुख लामिछानेका अनुसार निर्माण कम्पनीले सम्झौताअनुसार सडक स्तरोन्नतिको संरचना निर्माण गरेको र ढलानको गुणस्तर समेत अपेक्षा भन्दा उच्च रहेको नमुना परीक्षणमा देखिएको छ।
पहिलो चरणको ठेक्काबाट बचेको रु. २० लाख बराबरको बजेटमा थप कामका लागि पुनः ठेक्का आह्वान गरिएको नगर उपप्रमुख लामिछानेले जानकारी दिनुभयो।
इञ्जिनियर सुदीप गौतमका अनुसार योजना अन्तर्गत बेनी नगरपालिका–९ र १० को सिमाना पात्लेखेतमा पर्ने ९०८ मिटर सडक खण्डमा भित्ताकाट, पहिरो पन्छाएर सडक चौडा बनाउने, टेवा पर्खाल, नाली निर्माण लगायतका कार्यहरू सम्पन्न भएका छन्। यससँगै सडक ढलान, नाली, ग्यावियन जाली, पलम, मेशिनरी पर्खाल निर्माण भएपछि सडक अझ सहज र सुरक्षित भएको बताइएको छ।
निर्माण कम्पनीका सञ्चालक सुवासचन्द्र कार्कीले सम्झौता पश्चात पर्याप्त मजदुर, उपकरण तथा सामग्री व्यवस्थापन गरेर समयमै कार्य सम्पन्न गरिएको जानकारी दिनुभयो।
यस सडकको ट्र्याक पहिलोपटक वि.सं. २०५६ मा तत्कालीन जिल्ला विकास समितिले खोलेको हो। त्यसपछि बेनीदेखि अर्थुङ्ग हुँदै किराखोरसम्म करिब ६ किलोमिटर सडक कालोपत्र गरिएको छ। किराखोरदेखि तोरीपानीको गलेश्वर माविसम्मको चार किलोमिटर खण्डमा भने प्रदेश सरकारको पूर्वाधार विकास कार्यालयमार्फत स्तरोन्नति कार्य जारी छ।
पछिल्लो समय नेप्टेचौरको वडा कार्यालय हुँदै गिठीनी–पात्लेखेततर्फको खण्डलाई वैकल्पिक मार्गका रूपमा स्तरोन्नति गर्न नगरपालिकाले काम थालेको छ। बेनी नगरपालिकाका प्रमुख सुरत केसीले म्याग्दी जिल्लाकै प्राथमिकतामा रहेको बेनी–पाखापानी सडक योजनाको प्रभावकारी कार्यान्वयनका लागि आवश्यक समन्वय तथा सहजीकरण गरिएको जानकारी दिनुभयो। धौलागिरी खबरबाट
