म्याग्दी, चैत-१४, नेपाल पत्रकार महासङ्घको ७० औँ स्थापना दिवसको पूर्वसन्ध्यामा म्याग्दीमा पत्रकारहरूबीच मैत्रीपूर्ण फुटसल प्रतियोगिता सम्पन्न भएको छ। नेपाल पत्रकार महासङ्घ म्याग्दी शाखाले बिहीबार बेनीमा आयोजना गरेको प्रतियोगितामा म्याग्दी र बागलुङका पत्रकारहरूको सहभागिता रहेको थियो।
प्रतियोगितामा नेपाल पत्रकार महासङ्घ बागलुङ शाखाका दुई समूह, म्याग्दी शाखा र म्याग्दी मिडिया सोसाइटीका एक/एक समूह गरी चार समूहले प्रतिस्पर्धा गरेका थिए। प्रतियोगितामा बागलुङ पत्रकार महासङ्घ ‘रातो’ समूह प्रथम र ‘निलो’ समूह द्वितीय हुन सफल भएको छ।
प्रतियोगिताले म्याग्दी र बागलुङका पत्रकारहरूबीचको सम्बन्धलाई थप सुमधुर बनाउनुका साथै शारीरिक तथा मानसिक स्वास्थ्यलाई पनि सकारात्मक प्रभाव पारेको आयोजकले जनाएको छ। कार्यक्रममा पत्रकारहरूले खेलकुदले आपसी भाइचारा र सहकार्यको भावनालाई प्रवर्द्धन गर्ने विश्वास व्यक्त गरेका थिए।
पत्रकार महासङ्घ म्याग्दीका अध्यक्ष हरिकृष्ण गौतमले खेलकुद पत्रकारहरूका लागि मनोरञ्जन र आपसी सम्बन्ध सुधारको अवसर भएको बताए। उनले यस्ता कार्यक्रमहरूले पत्रकारहरूलाई कामको तनावबाट मुक्त हुन र एकअर्कासँग घुलमिल हुन मद्दत गर्ने विश्वास व्यक्त गरे।
प्रतियोगिता समापन कार्यक्रममा विजयी टोलीलाई पुरस्कार वितरण गरिएको थियो। कार्यक्रममा नेपाल पत्रकार महासंघ गण्डकी प्रदेशका उपाध्यक्ष प्रकाश पौडेल, म्याग्दी र बागलुङका पत्रकारहरूको उल्लेख्य उपस्थिति रहेको थियो।
