देवी जिसी/जलजला, चैत-८, ६०औँ अन्तर्राष्ट्रिय जातीय विभेद उन्मूलन दिवस–२०८१ को अवसरमा पर्वतको जलजला गाउँपालिकाले अन्तरजातीय विवाह गरेका २८ जोडीलाई नगद सहित सम्मान गरेको छ। शुक्रबार पालिका केन्द्र लामाखेतमा आयोजित कार्यक्रममा गाउँपालिकाले उनीहरूलाई सामाजिक रूपान्तरणमा पुर्याएको योगदानको कदर गर्दै सम्मानपत्र तथा नगद पाँच हजार रुपैयाँ प्रदान गरेको हो।
गाउँपालिका अध्यक्ष राजुप्रसाद आचार्यका अनुसार छुवाछुत र भेदभाव उन्मूलनमा महत्त्वपूर्ण भूमिका खेलेकोले अन्तरजातीय विवाह गर्ने जोडीलाई सम्मान गरिएको हो। कार्यक्रममा प्रमुख अतिथि गण्डकी प्रदेश सभा सदस्य नन्दकला दमाई नेपालीले अन्तरजातीय विवाहलाई अझै समाजले सहज रूपमा स्विकार्न नसकेको बताउँदै सम्मान कार्यक्रमले विवाहित जोडीलाई हौसला प्रदान गर्न र समाजमा जनचेतना अभिवृद्धि गर्ने विश्वास व्यक्त गर्नुभयो।
गाउँपालिका उपाध्यक्ष दीपक आचार्यले समाजमा अन्तरजातीय विवाहप्रति सकारात्मक दृष्टिकोण विकास गराउनु र विवाहित जोडीलाई प्रोत्साहन दिनु कार्यक्रमको प्रमुख उद्देश्य रहेको बताउनुभयो।
कार्यपालिका सदस्य तथा दलित अधिकारकर्मी भिमसेन बहादुर विश्वकर्माले पालिकाभित्रका सबै वडामा दलित र गैरदलित बीच विवाह भएका जोडीहरूको विवरण संकलन गरेर सम्मान गरिएको जानकारी दिनुभयो।
कार्यक्रमका सम्मानित अतिथि तथा गण्डकी प्रदेशको भौतिक पूर्वाधार विकास तथा यातायात व्यवस्था मन्त्रालयका अधिकृत कृष्ण विश्वकर्माले अन्तरजातीय विवाहका कारण आफूले भोगेका समस्या, चुनौती र अवसरबारे अनुभव बाँड्दै समाजमा यस प्रकारका विवाहप्रति सकारात्मक सन्देश प्रवाह गर्न सम्मान कार्यक्रमले महत्त्वपूर्ण भूमिका खेल्ने बताउनुभयो।
यसै अवसरमा गाउँपालिकाले गत वर्ष कक्षा ८, १०, र राष्ट्रिय परीक्षा बोर्डले संचालन गरेको कक्षा १२ को परीक्षामा उत्कृष्ट अंक ल्याउने दुई/दुई जना दलित छात्र-छात्रालाई नगद तीन हजार रुपैयाँ सहित सम्मान गरेको गाउँपालिकाकी महिला, बालबालिका तथा जेष्ठ नागरिक शाखा अधिकृत विन्दु शर्माले जानकारी दिनुभयो।
