म्याग्दी, १० माघ, सेतोढुङ्गा सहरी स्वास्थ्य केन्द्रको नवनिर्मित भवन उद्घाटन तथा हस्तान्तरण भएको छ । म्याग्दीको बेनी नगरपालिका–५, पुलाचौरको भिरमुनिस्थित सेताढुङ्गामा हालै नयाँ बनाइएको सहरी स्वास्थ्य केन्द्रको भवन बुधवार एक समारोहबीच उद्घाटन गरी हस्तान्तरण गरिएको हो । यसअघि सहरी स्वास्थ्य केन्द्रको भवन सानो र साँघुरो तथा बाढीपहिरो एवं भूकम्पको जोखिममा परेपछि नयाँ भवन बनाइएको हो ।
ग्लोबल केयर जर्मनबाट भवन तथा गेट निर्माण, शौचालय र सहरी स्वास्थ्य केन्द्रलाई आवश्यक औषधी तथा उपकरण सहयोग गरी असल छिमेकी नेपालमार्फत झण्डै २७ लाख रुपैयाँ लगानी भएको छ । स्थानीयको आवश्यकता, चाहना, वडा र बेनी नगरपालिकाको पहलमा भवन
निर्माण गरी हस्तान्तरण गरिएको छ । नवनिर्मित भवनको बेनी नगरपालिकाका नगर प्रमुख सुरत केसी र उपप्रमुख ज्योति लामिछानेले
उद्घाटन गर्नुभयो । यसअघि कार्यक्रमलाई सम्बोधन गर्दै नगर प्रमुख केसीले सेतोढङ्गा सहरी स्वास्थ्य केन्द्रको नवनिर्मित भवनको स्थानीयवासी स्वयंले अपनत्व लिएर संरक्षण गर्नुपर्ने बताउनुभयो । उहाँले बेनी नगरपालिकाले आम नगरवासीको स्वास्थ्यलाई ध्यानमा राखेर स्वास्थ्य सम्बन्धी विभिन्न कार्यक्रमहरु सञ्चालनमा जोड दिएको बताउँदै नवनिर्मित भवनलाई आवश्यक संरक्षण गरी स्वास्थ्य सेवा लिन समुदायलाई सुझाव दिनुभयो । नगर प्रमुख केसीले विगतमा असल छिमेकी नेपालले बेनी नगरपालिकाका स्वास्थ्य संस्थाहरुलाई चाहिने
स्वास्थ्य सामग्री उपलब्ध गराएको तथा विपन्न नागरिकहरुको उत्थानका लागि आयआर्जनको क्षेत्रमा बिऊबिजनलगायत सहयोग गरेको बताउनुभयो । उहाँले असल छिमेकी नेपालसँग बेनी नगरपालिका जोडिएको र आउँदो दिनमा पनि स्वास्थ्य क्षेत्रका लागि चरणबद्ध रुपमा सहयोगको आग्रह गरिएको बताउनुभयो ।
बेनी नगरपालिकाका नगर उपप्रमुख ज्योति लामिछानेले असल छिमेकी नेपालले सेतोढुङ्गा सहरी स्वास्थ्य केन्द्रको भवन बनाइदिएर नगरपालिकाको बोझ घटाइदिएको बताउनुभयो । उहाँले नवनिर्मित भवनमा सकभर बिरामी भएर कोही नागरिक पनि आउन नपरोस् र भवनको दिर्घकालीन रुपमा सदुपयोग गर्नुपनेर् बताउँदै यसबाट निरोगिता बाँड्न र स्वस्थ नागरिक बनाउन जोड दिनुपर्ने बताउनुभयो । नेपाल सरकारले ९८ प्रकारका औषधीहरुको निःशुल्क व्यवस्था गरेपनि सहरी स्वास्थ्य केन्द्रसम्म ४० प्रकारका औषधी आएर पनि त्यो पर्याप्त नभएको र स्वास्थ्य संस्थाहरुमा जनशक्तिको समेत अभाव रहेको उहाँको भनाइ थियो ।
कार्यक्रममा बेनी नगरपालिका वडानम्बर ५ का वडाध्यक्ष गोविन्द बानियाँले नयाँ भवनको संरक्षण गर्ने जिम्मेवारी आम समुदायको रहेकाले असल छिमेकी नेपालसँग आगामी दिनमा पनि सहकार्य गरिने बताउनुभयो । असल छिमेकी नेपालका कार्यकारी निर्देशक राजेन्द्र अधिकारीले भवन निर्माण, आर्थिक विवरण र औषधीलगायत विषयमा स्पष्ट पार्नुभएको कार्यक्रममा पोखरा क्रिस्चियन समाजका अध्यक्ष कालु तामांग, भवन निर्माण समितिका अध्यक्ष गिरेन्द्र बानियाँ र स्थानीय मुक्तिबहादुर खड्काले मन्तव्य व्यक्त गर्नुभएको थियो । कार्यक्रममा छोटो समयमा सहरी स्वास्थ्य केन्द्रको भवन निर्माण गरिदिने निर्माण व्यवसायी, सहयोग पु¥याउने विभिन्न व्यक्ति र संघसंस्थालाई असल छिमेकी नेपाल तथा बेनी नगरपालिका र वडाबाट प्रशंसापत्र प्रदान गरिएको थियो । कार्यक्रम असल छिमेकी नेपालका कार्यकारी अध्यक्ष मुक्तिनाथ ढकालको अध्यक्षता र कार्यक्रम अधिकृत सुरेन्द्र दासको सञ्चालनमा सम्पन्न भएको थियो ।
