बेनी, मङ्सिर-२८, बेनीस्थित न्यू वेष्ट प्वाइन्ट आवासीय माध्यमिक विद्यालयले कक्षा १० का छात्र अमित पुर्जालाई आर्थिक सहयोग प्रदान गरेको छ। मिति २०८१ मंसीर २५ गते विद्यालयका शिक्षक कर्मचारीहरूबाट संयुक्त रूपमा संकलन गरिएको रु ६१,४५५ (एकसठ्ठी हजार चारसय पचपन्न रुपियाँ) को सहयोग रकम विद्यालयको प्रिन्सिपल कार्यालयमा छात्र अमितका अभिभावक करूणा छन्त्याललाइ प्रदान गरिएको हो।
म्याग्दीको अन्नपुर्ण गाउँपालिका १ दोबा स्थायी बासिन्दा रहनुभएका अमितका बुवा नौ प्रसाद पुर्जाको हालै मृगौला रोगका कारण निधन भएको थियो। उपचारको क्रममा उनको वैदेशिक रोजगार र व्यवसायबाट आर्जन गरिएको सम्पूर्ण सम्पत्ति खर्च भएपछि परिवार आर्थिक संकटमा परेको थियो।
विद्यालयले छात्र र उनको परिवारलाई सहयोग पुर्याउनका लागि यो पहल गरेको हो। विद्यालयका प्रिन्सिपल डी.वि. दाहालका अनुसार यस प्रकारको सहयोगले विद्यार्थीलाई भावनात्मक रूपमा प्रेरित गर्नाका साथै कठिन परिस्थितिमा सहयोगी भावनाको प्रवर्द्धन गर्न मद्दत पुर्याउँछ।
अन्नपूर्ण गाउँपालिका स्थायी घर भएका अमित पुर्जाको परिवारको आर्थिक स्थिति कमजोर बनेको परिस्थितिमा विद्यालयले देखाएको सहयोगले विद्यार्थी, अभिभावक र शिक्षकबीचको सहकार्यको राम्रो उदाहरण प्रस्तुत गरेको छ। विद्यालय प्रशासनले छात्र अमित र उनको परिवारप्रति सहानुभूति प्रकट गर्दै विद्यालयमा उनको पठन पाठन लगायतका अबस्थामा सदैव सहयोग गर्ने प्रतिवद्धता जनाएको छ।
