२२ औं जेसिज कपको उपाधि माउन्ट एभरेष्टले जित्यो

निकै प्रतिस्पर्धात्मक खेलमा निर्धारित समयमा १–१ गोलसँगै पेनाल्टी सुटआउटको अन्तिम प्रहारमा बेनी सामुदायिकका खेलाडी चुक्दा जेसीज कपको इतिहासमै पहिलोपटक विजेता बन्ने सपना अधुरै रह्यो भने ६ संस्करण पछि माउण्ट एभरेष्टले उपाधिको स्वाद लिएको छ।

यस अघि सन २०१६ मा १५ औं संस्करणको उपाधि जितेको माउण्टलाई पुनः उपाधि जित्नका लागि २२ औं संस्करण सम्म कुर्नु परेको थियो।

प्रतियोगिताका विजेता माउण्ट एभरेष्टले जनप्रिय मावि दरबाङ र उपविजेता बेनी सामुदायिक माविले डिफेन्डिङ च्याम्पियन न्यु वेष्ट पोइन्ट आवासीय माविलाई हराउँदै फाइनलमा प्रवेश गरेका थिए।

प्रतियोगितामा विजेता विद्यालयलाई गण्डकी प्रदेशसभाका सदस्य हरि भण्डारीले रनिङ शिल्ड, ट्रफि, मेडल र प्रमाणपत्र सहित नगद ५२ हजार २२२ र उप(विजेतालाई ट्रफि, मेडल र प्रमाणपत्रको साथमा नगद ३२ हजार २३२ पुरस्कार प्रदान गरेका थिए।

पुरस्कार वितरणमा बेनी नगरपालिकाका प्रवक्ता रमेशकुमार श्रेष्ठ, जिल्ला खेलकुद विकास समितिका अध्यक्ष दिनेश केसी, म्याग्दी उद्योग वाणिज्य संघका अध्यक्ष सुविन श्रेष्ठ, म्याग्दी जेसीसका अध्यक्ष दिनेश बानियाँ लगायतको उपस्थिति रहेको थियो।

प्रतियोगितामा सर्वाधिक गोलकर्ता ११ गोल सहित न्यु वेष्ट पोइन्ट आवासियामविका  सुनिल थापा, उत्कृष्ट गोलरक्षक बेनी सामुदायिकका सन्दिप खत्री, उत्कृष्ट डिफेन्डर माउण्ट एभरेष्टका मनोज मल्ल रहेका छन्।

त्यस्तै, उत्कृष्ट स्ट्राईकर माउण्ट एभरेष्टका सनम बिक, उत्कृष्ट मिडफिल्डर न्यू वेष्ट प्वाइन्टका पवन खत्री, राईजिङ प्लेयर एन्जल थजाली माउण्ट एभरेष्ट तथा उत्कृष्ट प्रशिक्षक माउण्ट एभरेष्ट आवासीय माविका टिपेन पुन र अनुशासित टिम न्यू वेष्ट प्वाइन्ट आवासीयलाई सम्मान गरिएको मूल संयोजक देवेन्द्र घिमिरेले बताए।

२२ औं अन्तरमावि जेसीज कप फुटबल प्रतियोगिताका लागि एभरेष्ट ग्लोबल एजुकेशन भिसा सर्भिसेस बेनीले सन् २०२८ सम्म मुख्य प्रायोजन गरेको छ।