बेनी, मंसिर-१४, म्याग्दीको बेनीमा लायन्स क्लब अफ बेनी लभ्लीहिलको आयोजनामा खुल्लामञ्चमा जारी अन्तर माध्यमिक विद्यालय स्तरीय छात्रा फुटबलको उपाधिका लागि बेनी सामुदायिक मावि र न्यू वेष्ट पोइन्ट आवासीय माविबीच प्रतिस्पर्धा हुने भएको छ । शुक्रबार सम्पन्न भएको सेमिफाइनलमा बेनी आवासीय माविलाई ०-५ गोलले पराजित गर्दै बेनी सामुदायिक मावि फाइनलमा प्रवेश गरेको छ। त्यसैगरी न्यु वेष्ट पोइन्टले बालमन्दिर मावि कालिपुललाई फराकिलो अन्तर ०-७ गोल गरेको थियो। फाइनलमा प्रवेश गरेका बेनी सामुदायिक र न्यु वेष्ट पोइन्टको खेल निकै रोचक हुने देखिएको छ ।
प्रतियोगितामा पहिलो खेलमै उपाधिको दावेदार मानिएको प्रकाश माविलाई पन्छाउन सफल भएको वेष्ट पोइन्टका सुरुवात देखि नै उत्कृष्ट लयमा देखिन्छन् । त्यसैगरी बेनी सामुदायिकको खेलमा एट्याकिङमा निकै राम्रो देखिएको छ भने डिफेन्डर, मिडफिल्डर सहितको पोजिसन अहिलेसम्म राम्रो देखिन्छ ।
बुधबारदेखि सुरु भएको प्रतियोगितामा १० विद्यालयको सहभागिता रहेको थियो । प्रतियोगिताको विजेताले ३५ हजार, उपविजेता २० हजार रुपैयाँ सहित मेडल, ट्रफी र प्रमाणपत्र र अनुशासित टिमलाई ५ हजार रुपैयाँनगद प्रदान गरिने छ । त्यसैगरी उत्कृष्ट खेलाडी, उत्कृष्ट गोलरक्षक, सर्वाधिक गोलकर्ता, उत्कृष्ट डिफेन्डर, उत्कृष्ट मिडफिल्डर, उत्कृष्ट स्ट्राइकर, उत्कृष्ट प्रशिक्षक र राइजिङ प्लेयरलाई नगद सहित पुरस्कृत गरिने लायन्स क्लब अफ बेनी लभ्लीहीलका कोषाध्यक्ष भिमनाथ शर्माले जानकारी दिनुभयो ।
प्रतियोगिताले विद्यालयस्तरमा रहेका छात्राको फुटबल प्रतिभाको पहिचान तथा आगामी दिनमा हुने प्रदेशस्तरीय खेलमा समेत सहभागिताका लागि आवश्यक तालिम सहितका योजना बनाउन सहज भएको आयोजक लायन्स क्लब अफ बेनी लभ्लीहीलका अध्यक्ष सोहन श्रेष्ठको भनाई छ । प्रतियोगिताको फाइनल शनिबार विहान ११ बजेदेखि सञ्चालन हुने आयोजकले जनाएको छ ।
