नेपालका पहाडी क्षेत्रहरू आफ्नो अनुपम प्राकृतिक सौन्दर्य, ग्रामिण जीवनशैली, र मौलिक सांस्कृतिक परम्पराहरूको लागि प्रसिद्ध छन् । यिनै मध्ये एक अनमोल गहना हो म्याग्दी जिल्लाको मंगला गाउँपालिका-३ मा पर्ने झाँक्रीपानी, जसले पर्यटकलाई सुन्दर दृश्यावलोकन, स्थानीय परिकार र ग्रामिण जनजीवनसँग नजिकिने अवसर प्रदान गर्छ ।
प्राकृतिक सौन्दर्य र दृश्यावलोकनको केन्द्र
समुन्द्री सतहबाट २,२०० मिटरको उचाइमा अवस्थित झाँक्रीपानी प्राकृतिक सौन्दर्यले भरिपूर्ण छ । यहाँबाट धौलागिरि, अन्नपूर्ण, निलगिरि, मानापाथी, माछापुछ्रे हिमाल लगायतका हिमालहरू आँखै अगाडि प्रत्यक्ष अवलोकन गर्न सकिन्छ । बेनीबाट डेढ घण्टाको सडक यात्रा गरेर पुग्न सकिन्छ । झाक्रीपानी पुग्न बेनी देखि सुर्केमेला थामडांडा अर्जेखोला आर्भाङ्ग हुदै जाने पुरानो सडक मार्ग रहेको छ भने बेनी सिंगा तातोपानी हुँदै पखेर सम्मको पक्कि सडक र पखेरबाट पींगे, पिपल डांडा, खर्क, खर्सुपानी, आर्भंग हुँदै पुग्न सकिन्छा यो मार्ग अत्यन्तै छोटो र सजिलो मार्ग हो पैदल यात्रा गर्नकोलागी पनि बाबियाचौर, पखेरबाट सजिलो पदमार्ग रहेको छ यसरी यात्रा गर्दा यात्रा आफैं रमणीय छ, जसमा ग्रामीण परिवेश, जंगल, फागुनदेखि बैशाखसम्म ढकमक्क हुने लालीगुराँसको फूलहरूले यात्राको सौन्दर्य अझै बढाउँछ ।
स्थानीय जीवनशैली र पर्यटकको आतिथ्य
झाक्रिपानी अधिकांश मगर हरुको बस्ति रहेको गाउँ हो गाउँको वरीपरी रहेका ढुङ्गाका छानो भएका घरहरू, कोदोका लहलहाउँदा बारी, जंगल र स्थानीय बस्तीले पर्यटकलाई प्राकृतिक जीवनशैलीको अनुभव दिन्छन् । यहाँका बासिन्दाहरूले पर्यटकहरूलाई मौलिक लोकगीत र नाचसहित स्वागत गर्छन्। पर्यटकहरूले यहाँको फापर, जौ, कोदोको ढिंडो, मकै भट्ट, लोकल कुखुराको मासु, गुन्द्रुक, भांगोको चटनी जस्ता अर्गानिक खानाको स्वाद लिन सक्छन् । ग्रामिण खाना र आतिथ्यताको स्वादले पर्यटकको अनुभव अझै मीठो बनाउँछ ।
पर्यटकीय पूर्वाधारको विकास
अहिले झाँक्रीपानीमा भ्यू टावर, सामुदायिक भवन, पदमार्ग लगायतका पूर्वाधारहरूको विकास भएको छ। पहिले नांगो डाँडाका रूपमा रहेको यो क्षेत्र गाउँपालिकाको पहल र स्थानीयको जनश्रमदानबाट एक पर्यटकीय गन्तव्यका रूपमा स्थापित भएको छ । होमस्टे व्यवस्थापनका लागि गण्डकी प्रदेशले बजेट उपलब्ध गराएको छ, जसले गाउँलेहरूले आफ्नै हातले बनाएको परिकार खुवाएर पर्यटकलाई थप आकर्षित गरिरहेका छन् ।
किंवदन्ती र धार्मिक महत्त्व
झाँक्रीपानीको नामको उत्पत्ति स्थानीय किंवदन्तीमा आधारित छ । भनिन्छ कि यस क्षेत्रमा एक झाँक्रीले तान्त्रिक विधिबाट पानीको स्रोत उत्पन्न गरेका थिए, जसले गर्दा गाउँको नाम झाँक्रीपानी रहन गएको हो । प्राचिन इतिहास बोकेको पुरानो कुवा अहिले पनि देख्न सकिन्छ । यसले गर्दा यो स्थानलाई धार्मिक दृष्टिले पनि महत्वपूर्ण मानिन्छ।
पर्यटनको सम्भावना र भविष्य
विगतमा पर्यटकीय स्थल बनाउन धेरै प्रयास भए पनि पूर्वाधारको कमीका कारण सफलता हात लाग्दैन थियो। अहिले भने गाउँपालिकाले चासो देखाई पूर्वाधार निर्माणसँगै यहाँ जंगली जनावरको संरक्षण र जंगल सफारीको योजना पनि अगाडि बढाएको छ । ग्रामीण जीवनशैली र स्थानीय संस्कृति संरक्षणसँगै यहाँको प्राकृतिक स्रोतलाई पर्यटकीय आम्दानीको स्रोत बनाउन सकिने ठूलो सम्भावना छ ।
यो गाउँ अहिले पर्यटकीय नक्शामा एक उदाउँदो गन्तव्यको रूपमा चिनिँदै गएको छ । प्राकृतिक सौन्दर्य, हिमाली दृश्यावलोकन, ग्रामिण जीवनशैली, र अर्गानिक खानामा रुचि राख्ने पर्यटकको लागि झाँक्रीपानी एक अनिवार्य भ्रमण गर्ने ठाउँ बनेको छ ।
तस्विर: कृष्ण जिसी
