बेनी,भदौ-८, म्याग्दीको बेनीमा अन्तरविद्यालय छात्रा फुटबल प्रतियोगिता उद्घाटन भएको छ । स्वर्गीय अनन्त गिरीको स्मृतिमा आयोजित तेस्रो दोभान कप अन्तर विद्यालय छात्रा फुटल प्रतियोगिता-२०८१ को शुक्रबार बेनीमा उद्घाटन गरिएको हो ।
शनिबारदेखि खेलकुद प्रतिस्पर्धा शुरु हुने प्रतियोगिताको बेनी नगर कार्यपालिकाका प्रवत्ता तथा वडा नं. ७ का वडा अध्यक्ष रमेश कुमार
श्रेष्ठले उद्घाटन गर्नुभएको हो ।
छ वटा विद्यालयले सहभागिता जनाएको प्रतियोगिताको उद्घाटन खेल शनिबार बिहान ८ बजे बेनीको खुल्ला मञ्चमा बेनी सामुदायिक मावि र न्यु वेष्ट पोइन्ट आवासीय मावि बिच हुने क्लवका खेल संयोजक सिद्धार्थ शाक्यले बताउनुभयो ।
प्रतियोगितामा प्रथम हुनेले रु. ४५ हजार नगदसहित मेडल, ट्रफी र प्रमाणपत्र प्राप्त गर्नेछन् । त्यस्तै, दोस्रो हुनेले रु. २५ हजार नगदसहित ट्रफी, मेडल र प्रमाणपत्र प्राप्त गर्ने क्लबले जनाएको छ ।
प्रतियोगिताको उत्कृष्ट खेलाडी, सर्वाधिक गोलकर्ता, उत्कृष्ट गोलरक्षकलाई तीन-तीन हजार रुपियाँ नगद प्रदान गरिनेछ । त्यस्तै, प्रतियोगिताको अनुशासित टिमलाई पाँच हजार रुपियाँ नगद पुरस्कार प्रदान गरिनेछ ।
न्यू दोभान युथ क्लबले आफ्नो क्लबका पूर्व अध्यक्ष अनन्त गिरीको स्मृतिमा खुल्ला अन्तरविद्यालय छात्रा फुटबल प्रतियोगिता आयोजना गरेको हो । खेलकुदको जग भनेकै विद्यालय स्तर भएकाले छात्राहरुमा रहेको फुटबल प्रतिभा उजागर गर्नका लागि क्लवले विगत तीन वर्षदेखि नियमित रुपमा छात्रा फुटबल प्रतियोगिताको आयोजना गरिरहेको क्लवका अध्यक्ष उपेन्द्र गिरीले बताउनुभयो ।
उद्घाटन कार्यक्रम न्यु दोभान क्लवका अध्यक्ष उमेन्द्र गिरीको अध्यक्षता जिल्ला खेलकुद विकास समितिका अध्यक्ष दिनेश केसीको विशेष आतिथ्यता, क्लवका सदस्य होममाया बुढाले स्वागत र सचिव बिशाल कार्कीले सञ्चालन गर्नुभएको थियो । कार्यक्रममा स्वर्गीय अनन्त गिरीका परिवारको तर्फबाट काका रमेश गिरी, बेनी नगरपालिका फुटबल संघका अध्यक्ष देवेन्द्र चोखालले मन्तब्य व्यक्त गर्नुभएको थियो ।
