म्याग्दी, साउन- ३०, म्याग्दीको हिस्तानामा जिप दुर्घटना हुँदा एक जनाको ज्यान गएको छ । जिल्लाको अन्नपुर्ण गाउँपालिका-७ हिस्तानमा आज बिहान करिब ९:५० बजे दुर्घटना हुँदा एकजनाको मृत्यु भएको र अन्य तीन जना घाइते भएका छन्।
ग. १ ज ७९४५ नम्बरको बलेरो जिप रोकिराखेको अवस्थामा अचानक ब्याक भएर सडकदेखि ५० मिटर तल खस्दा दुर्घटना भएको थियो।
दुर्घटनामा अन्नपुर्ण गाउँपालिका-७ हिस्तान निवासी ६४ वर्षीय भिम बहादुर पुन गम्भीर घाइते भएका थिए। उनलाई उपचारका लागि बेनी अस्पताल म्याग्दी लगिएको थियो, तर उपचारकै क्रममा बिहान १२:५० बजे मृत्यु भएको प्रहरीले जनाएको छ।
यसैगरी, दुर्घटनामा कुमार पुन (४१ वर्ष) को ढाडमा चोट लागेको छ, जसको अवस्था सामान्य रहेको र उनी हाल बेनी अस्पतालमा उपचाररत छन्।
दुर्घटनामा परेका जिप चालक ३६ वर्षीय केशव पुन पनि सामान्य घाइते भएका छन् र उनलाई प्रहरीको नियन्त्रणमा लिइएको छ। अन्य एक जना, ७१ वर्षीय विर बहादुर पुन, सामान्य चोटपटक लागेर घर फर्किएका छन्।
प्रहरीले घटनाको अनुसन्धान गरिरहेको जिल्ला प्रहरी कार्यालयका सुचनाधिकारी राजन रायमाझीले जनाकारी दिनुभएको छ ।
