कालिगण्डकी नदीमा पौडी खेल्दा एक जना बेपत्ता

पर्वत, साउन-९,  पर्वतको कुश्मा नगरपालिका वडा नं. १ स्थित सहस्रधारा नजिकै कालीगण्डकी नदिमा पौडिन गएका एक बालक नदिले बगाएर बेपत्ता भएका छन् । बागलुङको निसिखोला गाउँपालिका वडा नं. १ लेवाङ सात्ले घर भई आफन्तलाई भेट्न पर्वतको कुश्मा नगरपालिका वडा नं. १ सहस्रधारामा आएका जीत बहादुर पुनका छोरा १४ वर्षिय सन्तु पुन वेपत्ता भएका हुन् ।

सोमवार दिउँसो साढे १ बजेको समयमा तीन जना साथी मिलेर पौडिन गएकोमा सन्तुलाई कालीगण्डकीले बगाएर वेपत्ता बनाएको जिल्ला प्रहरी कार्यालय पर्वतले जनाएको छ । उनिसँगै पौडिन गएका १३ वर्षिय अर्जुन पुन र १४ वर्षिय वेद घर्ति मगर भने सकुसल फर्किएका छन् ।
अर्जुन र वेदले सन्तुलाई कालीगण्डकीले बगाएको खबर गरेलगत्तै पुगेको प्रहरीको टोलीले खोजी कार्य तीब्र बनाएको जिल्ला प्रहरी कार्यालय पर्वतका प्रहरी निरिक्षक भुवन बरामले जानकारी दिनुभयो। उर्लिदो भेलमा पौडिएर कालीगण्डकी नदि तर्न खोज्दा बगाएको हुनसक्ने अनुमान छ ।

तीनै जना युवा एक साता अघि अर्जुन पुनका आफन्तलाई भेट्नका लागि सहस्रधारामा आएका थिए। घटनाको थप अनुसन्धान भैरहेको प्रहरी निरिक्षक बरामले जानकारी दिनुभयो ।

अहिले विद्यालयहरु बर्खे बिदामा रहेको र अधिकांश बालबालिका नदि तथा खोलामा पौडी खेल्न जाने गरेका छन् बर्खायाम भएकोले खोला तथा नदीको बहाव बढेको छ त्यसैले अभिभावकले आफ्ना बालबालिकाको ख्याल गर्न प्रहरीले अनुरोध गरेको छ ।