बेनी,असार-५, न्यु वेष्ट प्वाइन्ट आवासीय माध्यमिक विद्यालयमा शैक्षिक सत्र २०८१ का लागि युवा रेडक्रस सर्कलको नयाँ कार्यसमिति गठन गर्न निर्वाचन कार्यक्रम सम्पन्न भएको छ। असार ४ गते विद्यालयको अडिटोरियममा सम्पन्न उक्त निर्वाचनले कक्षा ९ का छात्र सफल भण्डारीलाइ सभापतिमा चयन गरेको छ
निर्वाचनबाट, कक्षा ९ की छात्रा श्रृचा पुन उपाध्यक्ष, कक्षा ९ की पुजना पुन सचिव, कक्षा ९ का अशिष पुन उपसचिव, कक्षा ९ की सिल्भिया पुन कोषाध्यक्ष, कक्षा ९ का दिपलभ पाइजा सह-कोषाध्यक्षमा निर्वाचित भएका छन्। साथै, सदस्यहरुमा कक्षा ९ की अभयर्समिदा श्रेष्ठ, कक्षा ८ की युमी श्रेष्ठ, कक्षा ९ का विवश बुढाथोकी, कक्षा ९ का पवन खत्री निर्वाचित भएका छन्। मनोनित सदस्यमा कक्षा ९ की सोयशा पाइजा, कक्षा ९ की जेनिशा बरुवाल, कक्षा ९ का सनम अधिकारी, कक्षा ७ की आशिका शेरपुञ्जा र कक्षा ७ का शान्त शेरपुञ्जा चयन भएका छन्।
युरेसको निर्वाचनमा कक्षा ४ देखि कक्षा १० सम्मका कुल ७८२ छात्राछात्रहरु साधारण सदस्यको रूपमा सहभागी थिए। जसमध्ये ७५९ जना छात्राछात्रले मतदान गरेका थिए भने १७ मत बदर भएको थियो।
विद्यालयका प्रिन्सिपल डिबी दाहाल संरक्षकत्वमा सम्पन्न यस युरेस निर्वाचनको व्यवस्थापन अतिरिक्त क्रियाकलाप विभाग संयोजक तथा भाइस प्रिन्सिपल सरोज लकान्द्री र शिक्षक नायक सुदिप श्रेष्ठले गरेका थिए। निर्वाचन आयुक्तको रूपमा पूर्व शिक्षक नायक दलबहादुर शाही, मावि तह संयोजक शतिश श्रेष्ठ, र प्रावि तह संयोजक सुमन पौडेलको निर्वाचन मण्डलमा सदस्यता रहेको थियो। निर्वाचनलाई सफल बनाउन जिल्ला निर्वाचन कार्यालय म्याग्दीले मतपेटिका उपलव्ध गराएको थियो।
विद्यालयले हरेक वर्ष विद्यार्थीहरुलाई लोकतान्त्रिक आवधिक निर्वाचनको बारेमा व्यवहारिक ज्ञान दिने अभिप्रायले युरेस निर्वाचनको आयोजना गर्दै आएको छ। नयाँ कार्यसमितिले विद्यालयको युवा रेडक्रस सर्कललाई थप सक्रिय र प्रभावकारी बनाउने अपेक्षा राखिएको छ।
