म्याग्दी, ३० जेठ २०८१ – म्याग्दी जिल्लाको अन्नपूर्ण गाउँपालिका-३, दाना स्थित ज्ञानप्रकाश नमूना माध्यमिक विद्यालयमा विश्व कीर्तिमानी हिमाल आरोही निर्मल पुर्जाद्वारा स्थापित ‘Nims Dai for Education’ अक्षय कोषबाट विभिन्न कक्षाका उत्कृष्ट विद्यार्थीहरूलाई पुरस्कृत गरिएको छ।
विद्यालयमा बुधबार आयोजित विशेष कार्यक्रममा राष्ट्रिय परीक्षा बोर्डद्वारा २०७९ सालमा लिइएको कक्षा १२ को परीक्षामा विद्यालयबाट सबैभन्दा धेरै जिपिए ल्याउँदै प्रथम स्थान हासिल गरेका विपिन राम्जालीलाई रु. १,००,००० (एक लाख) पुरस्कार प्रदान गरियो। त्यसैगरी, २०७९ सालको एस.इ.इ. परीक्षामा विद्यालयबाट प्रथम भएका आश्विन बि.क.लाई रु. ८०,००० (असी हजार) र कक्षा ८ का प्रथम स्थान हासिल गरेका अप्सन पुर्जालाई रु. ५०,००० (पचास हजार) पुरस्कार प्रदान गरियो।
कार्यक्रममा बोल्दै प्रमुख अतिथि जिल्ला समन्वय समिति म्याग्दीका प्रमुख राजकुमार थापाले शिक्षा क्षेत्रको विकास र विद्यार्थीहरूको प्रगतिको लागि योगदान दिने कीर्तिमानधारी पर्वतारोही निर्मल पुर्जा “निम्स दाइ” प्रति आभार प्रकट गर्नुभयो । उहाँले यस किसिमको सम्मानले विद्यार्थीहरूलाई अझ मेहनतका साथ अध्ययन गर्न प्रेरणा मिल्ने विश्वास व्यक्त गर्नुभयो ।
पुरस्कार वितरणको यस अवसरमा विद्यालयमा अध्ययनरत सम्पूर्ण विद्यार्थीहरूलाई शैक्षिक सामग्री पनि वितरण गरिएको थियो । कार्यक्रममा विद्यालयको तर्फबाट सांस्कृतिक कार्यक्रम पुर्ख्यौली नाच तथा अभिभावकहरूको तर्फबाट नाच तथा नाटक प्रस्तुत गरिएको थियो।
विद्यालय परिवारले उच्च राशिको पुरस्कार प्राप्तगर्ने विद्यार्थीहरूलाई हार्दिक बधाई ज्ञापन र निर्मल पुर्जा सहित उहाँको परिवारप्रति उच्च सम्मान एवं हार्दिक आभार प्रकट गरेको छ । निर्मल पुर्जा र उहाँको परिवारले शिक्षा क्षेत्रमा गरेको यस महान कार्यले समाजमा सकारात्मक सन्देश प्रवाह गरेको र यसले अन्य व्यक्तिहरूलाई पनि यस्ता कार्यमा सहभागी हुन प्रेरित गर्ने अपेक्षा राखिएको विद्यालयले जनाएको छ ।
वि.सं. २०३२ सालमा स्थापित अन्नपूर्ण गाउँपालिका, दाना स्थित ज्ञानप्रकाश नमूना माध्यमिक विद्यालय जिल्लाको उत्कृष्ट नमुना विद्यालय हो। विद्यालयले शैक्षिक र अन्य अतिरिक्त क्रियाकलापमा जिल्लामा उत्कृष्ट स्थान हासिल गरेको छ।
