२५६८ औं बुद्ध जयन्तिको अवसरमा वेष्ट पोइन्टमा ध्यान तथा प्रबचन

बेनी, जेठ-१०, शान्तिका अग्रदूतका रूपमा विश्वमा परिचित सिद्धार्थ गौतमको २५६८औँ जयन्ती आज भगवान् विष्णुको नवौँ अवतारका रूपमा जन्म लिएका बुद्धको पूजा, आराधना एवं प्रवचन गरी मनाइँदै छ ।  अहिंसा नै शान्ति र मैत्रीको आधारशिला हो’, यस्ता अनेकौँ कालजयी सन्देशका वाहक भगवान् गौतम बुद्धको २५६८औँ जयन्ती शान्तिको कामना गर्दै आज देशभर मनाईदैछ ।

बुद्ध जयन्तिको अवसरमा बेनीको न्यु वेष्ट पोइन्ट विद्यालयले  ध्यान तथा प्रबचन गरि मनाएको छ । विद्यालयका शिक्षक राजु बस्यालले विद्यार्थीहरुलाई ध्यान, प्रणायाम गराउनुभएको हो । उहाँले विद्यार्थीहरुलाई बुद्ध दर्शनको महत्वको बारेमा प्रबचन समेत दिनुभएको छ । उहाँले  बुद्ध जयन्ति बौद्ध धर्मावलम्बीहरूको लागि मात्र नभएर , सम्पूर्ण विश्वका लागि महत्वपूर्ण पर्व रहेको र यो दिनले अहिंसा, करुणा, र शान्तिको सन्देश फैलाउने बताउनुभयो ।

बुद्ध जयन्तिलाई बैशाख पुर्णिमा पनि भनिन्छ, बौद्ध धर्मावलम्बीहरूको लागि एक प्रमुख पर्व हो। यो पर्व गौतम बुद्धको जन्म, बुद्धत्व प्राप्ति र महापरिनिर्वाण (मृत्यु) को सम्झनामा मनाइन्छ। बुद्ध जयन्ति हरेक वर्ष वैशाख पूर्णिमा अर्थात् हिन्दू पात्रो अनुसार वैशाख महिनाको पूर्णिमा तिथिमा मनाइन्छ। सिद्धार्थ गौतमले विश्व शान्ति स्थापनाका लागि पुर्‍याएका योगदानको स्मरणस्वरूप यो पर्व मनाउने गरिएको हो ।

गौतम बुद्धका शिक्षाहरू आजको विश्वमा पनि उत्तिकै सान्दर्भिक छन्। यो पर्वले मानवीय मूल्यहरू र जीवनका आदर्शहरूको पुनर्स्मरण गराउँछ। बुद्ध जयन्ति एउटा मात्र धार्मिक पर्व नभई, यो एक यस्तो दिन हो जसले शान्ति, अहिंसा, र करुणाको महत्वलाई पुनर्स्थापित गर्छ। आजको व्यस्त जीवनशैलीमा मानिसहरूले बुद्धका शिक्षाहरू अनुसरण गरेर आत्मा र समाजको कल्याण गर्न सक्छन्। यो पर्वले विश्वभरका मानिसहरूलाई एकताबद्ध गराउँछ र समानता, करुणा, र भाइचाराको भावना बलियो बनाउँछ।

यस अवसरमा, हामी सबैले गौतम बुद्धका शिक्षाहरूलाई आत्मसात गर्दै शान्ति र सद्भावको मार्गमा अघि बढ्न प्रेरणा लिनु आवश्यक छ।