बेनी, फागुन-१६, जिल्ला भलिबल संघ म्याग्दीलाई ठुलो धनराशिको सहयोग प्राप्त भएको छ । जिल्लाको भलिबल खेलको विकासका लागि गरिएको यो सहयोग हालसम्मकै सबैभन्दा ठूलो सहयोग हो । युवा पुस्तालाई भलिबलमा आकर्षित गर्न तथा प्रतिभाशाली खेलाडी उत्पादनमा सक्रिय जिल्ला भलिबल संघ म्याग्दीले स्थापना गरेको भलिबल कोषमा यूकेमा रहेका म्याग्देलीको साझा संस्था मोना यूकेले ४३ लाख ६१ हजार ३९९ रुपैयाँ आर्थिक सहयोग हस्तान्तरण गरिएको हो ।
बुधबार सदरमुकाम बेनीमा आयोजित एक समारोहमा मोना यूकेका अध्यक्ष कुमार फगामी, प्रतिनिधिसभा सदस्य खमबहादुर गर्बुजाले म्याग्दी भलिबल संघ म्याग्दीका अध्यक्ष तेजेन्द्र बानियाँलाई उक्त सहयोग हस्तान्तरण गरे । सोही अवसरमा मोना कुवेतबाट ५० हजार, भलिबल संघ कार्यसमितिको १ लाख २० हजार, मोना अन्तराष्ट्रियका अध्यक्ष ददिवल खड्काबाट १ लाख, प्रकाश कार्की यूएईबाट २० हजारसहयोग प्राप्त भएको छ ।
१ करोडको अक्षयकोषको लक्ष्य रहेकोमा हालसम्म ४६ लाख ५१ हजार ३९९ जम्मा भएको छ । सहयोग हस्तान्तरण कार्यक्रमका प्रमुख अतिथि प्रतिनिधिसभा सदस्य गर्बुजाले भलिबल खेललाई चलायमान बनाउन कोषले सहज हुने बताउनुभयो । जिल्लामा खेल क्षेत्रको विकास र खेलाडीहरुलाई प्रवर्द्धन गर्न आफुले सहयोग गर्ने सांसद गर्बुजाले प्रतिबद्धता जनाए । खेलकुद क्षेत्र सहित जिल्लाको हरेक क्षेत्रमा प्रवासी म्याग्दीलीहरुको ठूलो योगदान रहेको उल्लेख गर्नुभयो ।
कार्यक्रममा अन्नपूर्ण गाउँपालिकाका अध्यक्ष भरत पुन,म्याग्दीका प्रमुख जिल्ला अधिकारी लक्ष्मण ढकाल, जिल्ला खेलकुद विकास समितिका अध्यक्ष दिनेश केसी, महिला राष्ट्रिय भलिबलकी कप्तान अरुणा शाही, म्याग्दी उद्योग वाणिज्य संघका वरिष्ठ उपाध्यक्ष सुविन श्रेष्ठ , भलिबल संघका राष्ट्रिय उपाध्यक्ष याम गुरुङ, पत्रकार महासंघ म्याग्दीका उपाध्यक्ष हरिकृष्ण गौतमले अक्षष कोष म्याग्दी भलिबलका लागि स्वर्णीम अवसर सृजना गरेको बताउनुभएको थियो ।
मोना यूकेका अध्यक्ष कुमार फगामीले जिल्लास्तरमा भलिबलका राम्रा क्षमतावान खेलाडीलाई छनोट गरेर राष्ट्रिय टिमका लागि तयार गर्न सघाउने गरी कोषमा सहयोग गरेको बताउनुभयो । उहाँले म्याग्दी जिल्लामा भलिबलको प्रतिभालाई छनोट गरी, ट्रेनिङ गराउने, आन्तरिक तथा अन्तर्राष्ट्रिय प्रतियोगितामा ‘एक्सपोज’ गराउने, भलिबल क्षेत्रको विकासका लागि भविष्यमा पनि सहकार्य गर्ने बताउनुभयो ।
म्याग्दी भलिबल संघका अध्यक्ष तेजेन्द्र बानियाँले अक्षय कोष भलिबलका खेलाडीहरू उत्पादन तथा प्रशिक्षण र तालिममा केन्द्रित गर्ने बताउनुभयो । विद्यालय खेलकुद क्षेत्रको नर्सरी भएकाले खेल प्रतिभाको उत्पादन गर्नका लागि विद्यालयस्तरलाई केन्द्र विन्दुको रूपमा लिएर शिक्षकलाई समेत भलिबल खेलमा आर्कषित गरेको बताउनुभयो ।
कार्यक्रममा कलाकारहरुले नृत्य समेत प्रस्तुत गरेका थिए । सहयोग हस्तान्तरण कार्यक्रम जिल्ला भलिबल संघका अध्यक्ष तेजेन्द्र बानियाको अध्यक्षता , सचिव कुमार किसानको स्रवागत र सञ्चारकर्मी अमित विश्वकर्माले संचालन गर्नुभएको थियो ।
