शिख र प्रकाश माविले जिते जिल्ला स्तरीय अन्तर मावि भलिबलको उपाधि

बेनी, माघ-१३,  प्रथम म्याग्दी भलिबल कपको उपाधी छात्र तर्फ बेनीको प्रकाश मा.वि. र छात्रा तर्फ शिख मा.वि.ले जितेको छ । म्याग्दी जिल्ला भलिबल संघको आयोजनामा सदरमुकाम बेनीमा शनिबार सम्पन्न भएको प्रतियोगितामा छात्रतर्फ बेनी स्थित प्रकाश मावि प्रथम र मालिका गाउँपालिका स्थित किसानी मावि बिम. द्वितीय भएका छन त्यसैगरी  छात्रातर्फ अन्नपूर्ण गाउँपालिका–५ स्थित शिख मा. वि प्रथम र प्रकाश मावि द्वितीय भएका हुन् । निकै प्रतिस्पर्धात्मक खेलमा प्रकाश माविले १ सेट का बिरुद्द ३ सेट जित्दै उपाधि जित्न सफल भयो । त्यस्तै छात्रातर्फ प्रकाश माविले पहिलो दुई सेट लगातार जितेपनि बाँकी तीन सेट लगातार गुमाउँदा उपविजेतामा चित्त बुझाउनुपर्यो ।

प्रतियोगितामा बिजेता र उपविजेतालाई छात्रछात्रा टोलीलाई गण्डकी प्रदेशसभाका सांसद हरि भण्डारी, प्रमुख जिल्ला अधिकारी लक्ष्मण ढकाल लगायतले प्रथम पुरस्कार ५० हजार र द्वितीय पुरस्कार २५ हजार ट्रफी, मेडल र प्रमाणपत्र प्रदानगर्नुभएको थियो । प्रतियोगितामा म्याग्दी जिल्ला भलिबल संघ र जिल्ला प्रहरी कार्यालय बिच भएको मैत्रीपूर्ण भलिबलमा विजेता जिल्ला प्रहरीलाई नगद १० हजार पुरस्कार वितरण गरिएको थियो । प्रतियोगितामा छात्रातर्फ शिख माविकी कमला पाइजा र छात्रतर्फ प्रकाश माविका प्रेम बहादुर विक सवोत्कृष्ट घोषित भएका थिए ।

उत्कृष्ट खेलाडीलाई महिला राष्ट्रिय टोलीकी कप्तान अरुणा शाही, मुख्य प्रायोजक गौमती विकास कोषका सन्दिप खत्रीले नगद ५ हजार सहित ट्रफी प्रदान गरेका थिए । त्यस्तै प्रतियोगितामा विभिन्न विधागत उत्कृष्ट खेलाडी, प्रशिक्षकलाई समेत सम्मान गरिएको थियो । प्रतियोगितामा शिक्षकतर्फ २०, शिक्षिकातर्फ ९ र छात्रतर्फ १५ र छात्रातर्फ १२ वटा विद्यालय सहभागि भएका थिए ।