म्याग्दी, पुष-९, म्याग्दीको अन्नपुर्ण गाउँपालिकामा संचालित चौथो राष्ट्रपति रनिंग शिल्ड प्रतियोगिताको उपाधि प्रभा मा.वि. नाराच्यांगले जितेको छ । पोखरेबगरमा सोमबार सम्पन्न प्रतियोगितामा १० स्वर्ण, ५ रजत र ६ कास्य सहित २१ पदक जित्दै प्रभा मावि नारच्यांग प्रथम भएको हो । त्यसैगरी प्रतियोगितामा प्रतियोगितामा ८ स्वर्ण,४ रजत र २ कास्य सहित १४ पदक प्राप्त गर्दै मुक्ति मार्ग मावि घार द्धितीय भएको छ । त्यसैगरी प्रतियोगितामा ६ स्वर्ण, ११ रजत ४ कास्य सहित २१ पदक जितेर शिख मावि शिख तृतीय भएको गाउँपालिकाका शिक्षा अधिकृत गणेशबहादुर कटुवालले जानकारी दिनुभयो ।
प्रतियोगितामा बिजेता विद्यालय प्रभा मा.वी.ले नगद ५० हजार रुपियाँको साथमा रनिङ शिल्ड, ट्रफि, दोस्रो हुने मुक्तिमार्ग मावि घारले नगद ३० हजार ट्रफि, मेडल र तेश्रो हुने शिख माविले नगद २० हजार रुपियाँको साथमा ट्रफि, मेडल प्रदान गरिएको छ । साथै भलिबल,कबड्डी र एथलेटिक्सका तर्फ प्रथम हुने विद्यालयलाई पाँच/पाँच हजार रुपियाँ पुरस्कार प्रदान गरिएको उहाँले जानकारी दिनुभयो ।
तीनदिन सम्म संचालन भएको प्रतियोगितामा अन्नपुर्ण गाउँपालिका भित्रका विभिन्न ११ वटा विद्यालयका तीनसय विद्यार्थी खेलाडीहरुले सहभागिता जनाएका थिए ।
प्रतियोगितामा प्रभा मावि नारच्यांगले अघिल्लो वर्ष र यस वर्ष गरि लगातार २ पटक रनिंग शिल्ड जितेको हो ।
