शिशिरको चिसोले बगूँु कि नबगूँ झैँ गरिरहेको काली गण्डकी नदीको छेउमा बिशाल क्षेत्रमा फैलिएको एउटा विद्यालय परिसर । सोहि परिसरमा चिटिक्क सिंगारिएको मंच, फराकिलो मैदानमा जम्मा भएका १५४७ जना विद्यार्थीहरु तिनीहरुका अभिभावक र आगन्तुक पाहुनाहरुले भरिभराउ मैदान । त्यहाँ संचालन भैरहेका विभिन्न गतिबिधि (नाच, गान, नाटक, आदि) आफ्नै गतिमा थियो । मन्चमा कार्यक्रम संचालन भैरहेको थियो । कोहि नाच्नको लागि पालो कुरिरहेका कोहि पुरस्कार लिन तयारी अवस्थामा रहेका । पुष महिनाको चिसो सिरेठो चलेको भएपनि घमाइलो दिनमा आफ्ना नानीबाबुहरुको गतिबिधि हेर्न अविचलित अभिभावकहरु मैदानभरि रमाएर बसिरहेका थिए ।
अभिभावकहरुलाइ बस्न ब्यबस्था मिलाइएको कुर्चीको दोश्रो लहरमा एकजना अग्लो कदका अनुहारमा दाह्री पालेका युवा र उनैको छेउमा ढाका टोपीमा सजिएर बसेका ५५। ६० वर्षका एक अभिभावक । त्यहि लहरमा मध्यम कदकी चस्मा लगाएकी अर्की एक युवती आँखा झिमिक्कै नगरी अत्यन्तै चासो दिएर कार्यक्रम हेरिरहेका थिए ।
प्रसंग हो म्याग्दीको बेनी स्थित न्यु वेष्ट पोइन्ट आवासीय माविको ३१ औं वार्षिकोत्सव समारोहको । विद्यालयले अभिभावकहरुको भब्य उपस्थितिमा आफ्नो ३१ औं अभिभावक दिबस मनाइरहेको थियो । मंटेसरीदेखि कलेज सम्मका विद्यार्थीहरुको कार्यक्रम समावेश गर्नुपर्ने भएकोले कार्यक्रम निकै धेरै थिए । कार्यक्रमा संचालकले बडो चलाकी र होशियारी पूर्ण तरिकाले कार्यक्रमको संचालन र चाजोपाजो मिलाएको देख्दा कहिँ कतै अबरोध नभई कार्यक्रम सरसर्ती बगेको देखिन्थ्यो ।
कार्यक्रम अनुसार पुरस्कार वितरणको दोश्रो चरणसम्म आइपुग्दा झन्डै ४ बजिसकेको थियो तर माथि उल्लेख गरिएका दोश्रो लहरमा बसेका व्यक्तिहरु कत्तिपनि बिचलित भएका थिएनन् । उद्घोषकले वेष्ट पोइन्ट अवार्डको घोषणा गरेपछि मन्चमा उक्लिए, क्रान्ति लक्ष्मी कटुवाल र सज्जन थापा संगै उनका बुवा नरेन्द्र थापा । दुवै विद्यार्थीको नामको अगाडी डाक्टर थपिएको थियो । त्यसैगरि अर्का दुइ व्यक्तिको नामपनि उद्घोष भयो डा.जित पुन र इन्जिनियर आभाष श्रेष्ठ । जित पुन उपस्थित हुन नसकेका कारण उनका दिदि विद्यालयका पुर्व शिक्षिका डमसरा पुन र आभाष श्रेष्ठका बुवा सुबासकुमार श्रेष्ठ । सम्मानित हुनेहरु क्रान्ति लक्ष्मी कटुवाल वेष्ट पोइन्ट विद्यालयबाट २०६४ साल, जित पुन २०६६ साल, आभास श्रेष्ठ २०६४ साल र सज्जन थापा २०७० सालको SLC ब्याच थिए ।
डा. सज्जन थापा पर्वतको जलजला -३ निवासी हुन् उनि अहिले म्याग्दीको बेनी अस्पतालमा मेडिकल इन्चार्जको रुपमा कार्यरत छन् । उनले काठमाण्डौ विश्वविद्यालयबाट मेडिसिन एण्ड सर्जरीमा MBBS गरेका हुन् । त्यसैगरी क्रान्ती लक्ष्मी देवी कटुवाल म्याग्दीको रघुगंगा गाउँपालिका -२ स्थाई ठेगाना भइ अहिले जलजला -३ पर्बत बेनी बसोबास गर्दै आइरहेकी छिन र उनि बेनी अस्पतालमा फिजियोथेरापिस्ट हुन् । उनले डा. एम.भी. शेट्टी कलेजअफ फिजियोथेरापि कर्नाटक भारतबाट MPT गरेकी हुन्। त्यसैगरी जित पुन म्याग्दीको धौलागिरि गाउँपालिका -३ मुना स्थायी ठेगाना भइ भारतको अल इन्डिया इन्स्टिच्युट अफ मेडिकल साइन्स (AIMS) बाट अर्थोपेडिक्समाMS उपाधि हासिल गरेका हुन् भने आभास श्रेष्ठ बेनी नगरपालिका -८ स्थाई ठेगाना भइ अहिले अष्ट्रेलियामा रहेका छन् । उनले सेन्ट्रल क्वीन्सल्याण्ड युनिभर्सिटी अष्ट्रेलियाबाट इन्जिनियर्समा मास्टर गरेका हुन् ।
सम्मान ग्रहण पश्चात क्रान्ती लक्ष्मी देवी कटुवाल र सज्जन थापा अत्यन्तै भाबुक हुँदै विद्यालयले गरेको सम्मानप्रति आभार ब्यक्त गरे । बिगतका दिन र आफ्नो समयमा विद्यालयमा हुने गरेका यस्तै कार्यक्रम ति साथीहरुलाइ सम्झदै स्टेजमा नाचेका, मन्तब्य दिएका सबै स-साना भाइ बहिनीहरुमा आफु र आफ्ना साथीहरुको प्रतिबिम्ब देखिएको कारण निकै भाबुक र बिगतलाई सम्झदै कार्यक्रम हेरेको बताए । क्रान्तिले भनिन, “ति मेरा साथीहरु आज भैदिएको भए… ।”
जीवनको अत्यन्तै महत्वपुर्ण क्षण भनेको स्कुले जीवन हो एउटै बेन्चमा बस्ने, खाजा बाँडेर खाने, संगै खेल्ने, त्यो समय जतिबेला कुनै स्वार्थ हुदैन, रिस-राग, प्रतिस्पर्धा र वैमनस्यता हुदैन त्यस्तो समय भनेको विद्यालय जीवन नै हो । उच्च शिक्षा अध्ययनको लागी कलेज तथा विश्व बिद्यालय पुगेपछि साथीहरु थुप्रै भेटिन्छन् तर ति साथी जो संग बालापन गुजारिएको हुन्छ ति क्षण प्राप्त हुदैनन् । हरेक व्यक्तिले बालापनलाई सुनौलो समय मान्ने गर्छन यी र यस्तै अबस्थामा स्मरण हुने गर्दछन जो उनीहरुले अनुभूति गरे ।
उनीहरुले आफुले पढ्ने बेलाको भवन खेल्ने ठाउँ खाजाखाने ठाउँ सबै हेर्दै र सम्झदै त्यतिबेलाका सर। मिसहरुलाई धेरै सम्झना गरेका छन् । आफु उपस्थित हुन नसके पनि आफुलाई विद्यालयले सम्मान गरेकोमा डा. जित पुनले फेसबुकमा स्टाटस लेख्दै स्कुल अनि गुरुहरु प्रति आदर प्रकट गरेका छन् । आभाष श्रेष्ठका बुवा सुबास कुमार श्रेष्ठ छोराको सम्मान ग्रहणगर्दै गहभरी आँशु पारेर छोराको प्रगति प्रति विद्यालय र उनका शिक्षकलाई धन्यबाद दिए ।
विद्यालयले हरेक वर्ष वार्षिकोत्सवको अवसरमा वेष्ट पोइन्ट विद्यालयबाट विद्यालय शिक्षा पुरा गरि देश तथा विदेशबाट विभिन्न विषयमा विशिष्टता हासिल गर्ने विद्यार्थीहरुलाई वेष्ट पोइन्ट सम्मानद्वारा सम्मान गर्ने गरेको छ । सोहि क्रममा यस वर्ष ४ जनालाई सम्मान गरेको विद्यालयले जनाएको छ ।
