देवी जि.सी./ म्याग्दी, मंसिर-२०, म्याग्दीको बेनीमा अपाङ्गता दिवस मनाइएको छ । बेनी नगरपालिका स्थित बाल जागृती प्राथमिक विद्यालय चुत्रेनिमा अन्तराष्ट्रिय अपाङ्गता दिवसको अवसरमा एक कार्यक्रम गरि मनाइएको हो । बौद्धिक अपाङ्गता भएका बाल बालिकाको पढाइ हुने यस विद्यालयमा वार्षिक रुपमा कार्यक्रम गर्दै आएको छ ।
कार्यक्रममा बेनिनगरपालिकाका उपमेयर ज्योति लामिछानेले शारीरिक र मानसिक अपाङ्गता समाजमा बढ्नुको कारण जंक-फुड पनि भएको बताउनुभयो । त्यसैगरी स्वतन्त्र खोज पत्रकार राजु बस्यालले सन्तुलित र अन्य पौष्टिक खानाको अभाव वा नखानु, मानसिक तनावका कारण साथै आजभोली खेतीपातीमा समेत अत्यात्धिक मात्रामा रासायनिक मल र विषादीको प्रयोगले पनि अपाङ्गता बढ्दै गैरहेको बताउनुभयो । उहांले परिक्षण नै नगरिएका खोप लगाउनाले पनि यस्ता समस्या बढ्न सक्ने बताउनुभयो ।
रूम टु रिड, प्लान नेपाल, सेभ द चिल्ड्रेन जस्ता संस्थाहरुको सहयोगमा विद्यालय र छात्राबास भवन बनेको यस विद्यालयमा थप श्रोतको अभावमा तारबार र पर्खालको निर्माण गर्न नसक्दा विद्यार्थीहरु भाग्ने र बाहिरी खेलकुद हुँदा घाइते हुने समस्या रहेको विद्यालयका ब्यबस्थापन समितिका अध्यक्ष बिज्ञान केसीले बताउनुभयो ।
म्याग्दी प्रबासी नेपाली संघ (MONA) ले तिनवटा विद्यालय (बगुवाखोला, सिंगा र राखु ) मा ११ /११ लाख रुपैयाँको अक्षय कोष स्थापना गरेको छ तर यी वालवालिकाको जिवनपर्यन्त शिक्षा, सुरक्षा र सेवा एउटा गम्भीर समस्या रहेकोले त्यसतर्फ सरकारको ध्यान जानुपर्ने युवा नेता सन्दिप खत्रीले बताउनुभयो ।
कार्यक्रममा बेनी स्थित न्यु वेष्ट पोइन्ट आवासीय माध्यमिक विद्यालयका कक्षा ११ सेक्सन बि का बर्खा थापाको नेतृत्वमा कक्षा ११ का विद्यार्थीहरु सहभागी भएका थिए । सोहि कार्यक्रममा न्यु वेष्ट पोइन्ट स्कुलका प्रिन्सिपल डीबी दाहालले सरकार, संचार जगत, नागरिक समाज, समाजसेवी र विशेष गरि प्रबासमा रहेका सम्पन्न नेपालीहरुलाई अपाङ्गता भएका विद्यार्थीहरुको सेवामा खुलेर लाग्न र जन्मदिन बैबाहिक वर्षगाठ जस्ता अवसरमा त्यस्ता ठाउँमा गएर सेवा गर्न आह्वान पनि गर्नु भयो ।
कार्यक्रममा श्रवण शक्ति नभएका विद्यार्थीहरु,धौलागिरि मा.वि. सिङ्गा र दृष्टिबिहीन विद्यार्थीहरु अध्ययन गर्ने ज्ञानोदय मा.वि. राखुबाट समेत विद्यार्थीहरु सहभागी भएका थिए । कार्यक्रममा उनीहरुलाई खेल, मनोरंजन साथै पुरस्कार वितरण गरिएको थियो ।
