कृष्ण जिसी/जलजला अनलाइन, कार्तिक-१६,
त्यसो त नेपालका अग्ला डाँडाकाँडा आफैमा भ्यु टावर नै हुन् । जहाँका अग्ला डाँडाकाँडाबाट हिमाल हेर्न पाइन्छ । झनै म्याग्दी आफैमा हिमाली जिल्ला भएकोले म्याग्दीका हरेक अग्ला डाँडाबाट मनोरम हिम शृंखला हेर्न सकिन्छ म्याग्दीका धेरै ठाउँहरु मध्ये बेनि नगरपालिका वडा नं ३ को भकिम्ली मुसुंग र बाग्लुंग जिल्लाको काठेखोला गाउँपालिकाको सिमानामा पर्ने बेलढुंगा पछिल्लो समय दृश्यावलोकनका लागी आकर्षक गन्तब्य बनेको छ ।
समुद्री सतहबाट २६८८ मिटर उचाइमा रहेको बेल ढुंगाबाट पूर्वी रुकुमको चुरेन हिमालदेखि गोर्खाको मनास्लु हिमाल र ८ वटा जिल्लाका विभिन्न भूभागहरु देख्न पाइन्छ । दृश्यावलोकनका लागी अत्यन्तै उत्कृष्ट गन्तब्य भएपनि प्रचारप्रसार र पूर्वाधारको अभावका कारण पछाडी परेको छ ।
जिल्लाका यस्तै महत्वपुर्ण र पर्यटकीय सम्भावाना बोकेका म्याग्दीका स्थलहरुको प्रवर्धन गर्न नेपाल पत्रकार महासंघ म्याग्दी शाखाले स्थानीय सरोकारवाला निकायसँग सहकार्य गरी पर्यटन क्षेत्रलाई चलायमान बनाउने अभियान अन्तरगत पर्यटकीयस्थल बेलढुंगामा अन्तरक्रिया कार्यक्रम गरेको छ ।
कार्तिक १५ गते बेलढुंगामा गरिएको कार्यक्रममा बेनी नगरपालिका वडा नं ३ भकिम्लीका वडा अध्यक्ष पदमबहादुर पुनले बेलढुंगाको पर्यटन विकासले भकिम्लीबासीको आर्थिक जिवनमा समेत सुधार आउने बताउनुभयो ।
उहाँले भकिम्लीबाट बेलढुंगाको पर्यटन पूर्वाधारमा ६ बर्ष अगाडी १ लाख विनियोजन गरिएपछि पर्यटकीय गन्तब्य बनेको बताउनुभयो । त्यस्तै भकिम्लीका समाजसेवी पृथीबहादुर पुनले बेलढुंगालाई दुबै क्षेत्रबाट उच्च प्राथमिकता दिएकाले यो अवस्थामा आएको बताउनुभयो ।
पर्यटन क्षेत्र धरासायी हुँदै गएकोले यसलाई उकास्न आन्तरिक पर्यटकलाई घुमफिरको वातावरण बनाउनका लागि पत्रकार महासंघ म्याग्दीले सुरु गरेको अभियान अन्तरगतको कार्यक्रममा पत्रकार महासंघ म्याग्दी शाखाका संस्थापक अध्यक्ष घनश्याम खड्काले पर्यटकीय क्षेत्रमा पूर्वाधार विस्तार तथा प्रचारप्रसार आवश्यक रहेको बताउनुभयो ।
पत्रकार महासंघ म्याग्दीका अध्यक्ष प्रकाश पौडेलले म्याग्दीमा अनगिन्ती पर्यटकीय गन्तब्य भएपनि पर्यटक पुग्न नसकेका धेरै स्थानहरुमा बारेमा पत्रकार महासंघले पर्यटन प्रवद्र्धनमार्फत अभियान सञ्चालन गरेको बताउनुभयो । पर्यटकीय क्षेत्रलाई चलमायन बनाउन आन्तरिक पर्यटन प्रवद्र्धनका लागि स्थानीय, प्रदेश तथा संघीय सरकारले सहयोग गर्नुपर्ने उहाँले भनाई थियो । पत्रकार महासंघले म्याग्दीका ओझेलमा परेका पर्यटकीयस्थलहरुको पहिचान गरी सोहि स्थलमै पुगेर प्रचारप्रसारको थालनी गरेको छ ।
