बेनी, असोज-६, मोना अष्ट्रेलियाको आयोजनामा म्याग्दीको बेनीमा फोटो प्रदर्शनी तथा पुरस्कार वितरण कार्यक्रम सम्पन्न भएको छ । प्रवासमा रहेका म्याग्देलीहरुको साझा संस्था म्याग्दी प्रवासी नेपाली संघ (मोना ) अष्ट्रेलियाको आयोजनामा शुक्रबार ‘नदेखिएको म्याग्दी ’नामक फोटो प्रदर्शनी ,अन्तरक्रिया ,पुरस्कार वितरण तथा सम्मान कार्यक्रम सम्पन्न भएको हो ।
म्याग्दी जेसीजको समन्वयमा भएको कार्यक्रमको उद्घाटन जिल्ला समन्वय समितिका प्रमुख राजकुमार थापाले गर्नुभएको थियो । कार्यक्रममा फोटो प्रतियोगिताका विजेता, उपविजेता र सान्त्वना स्थान हासिल गर्ने प्रतियोगीलाई पुरस्कार वितरण गरिएको थियो सोहि कार्यक्रममा म्याग्दीका अग्रज फोटोग्राफरहरु, एसईईमा सर्वोत्कृष्ट अंक ल्याउने प्रकाश माविका समिर सुवेदी लगायतलाई सम्मान गरिएको थियो ।
प्रतियोगितामा प्रथम अन्नपुर्ण गाउँपालिका-५ ,शिखका गणेश गुरुङ (सुरेन), द्वितिय, बेनी नगरपालिका -५, का अनुप बानियाँलाई क्रमश नगद रु. २० हजार, १० हजार रुपैयाँसहित ट्रफी र प्रमाणपत्र प्रदान गरिएको थियो । त्यसैगरी तृतिय र सान्त्वना स्थान हासिल गर्ने क्रमश: रघुगंगा गाउँपालिका- ३, पिप्लेका भविन्द्र शाही र बेनी नगरपालिका– ७, की रेन्जिसा श्रेष्ठलाई पाँच हजार र तीन हजार नगद सहित ट्रफि र प्रमाणपत्र प्रदान गरिएको थियो ।जिसस प्रमुख थापा , मोना अष्ट्रेलिया अक्षयकोषका संरक्षक दिपेन्द्र श्रेष्ठ लगायतले पुरस्कार तथा सम्मानपत्र हस्तान्त्तर गर्नुभएको थियो ।
त्यसैगरी एसईईमा ४ जिपिए ल्याउने समिर सुवेदीलाई १५ हजार नगद सहित सम्मान गरिएको छ । कार्यक्रममा म्याग्दीका पहिलो पटक फोटोग्राफर अंगद श्रेष्ठ, त्यसैगरी अग्रज फोतोग्राफरहरु अमर बानियाँ ,प्रकाश कुमार श्रेष्ठ, सन्जयकुमार श्रेष्ठ, भोजबहादुर रिजाल, साथै सन्तोष महत र मोना अन्तर्राष्ट्रिय कार्यसमितिका वरिष्ठ उपाध्यक्ष ददिवल खड्कालाई समेत सम्मान गरिएको छ ।
मोना अष्ट्रेलियाको योजनामा गत साउनको ६ देखि ९ गतेसम्म म्याग्देलीहरु मार्फत म्याग्दीका पर्यटकीय स्थलको तस्विर संकलन गरी प्राप्त भएका फोटोहरु आफ्नो फेसबुक पेज मार्फत सार्वजनिक गरेको थियो । प्रतियोगिता साउन ३० गतेसम्म सञ्चालन भएको र १३९ जना सहभागी भएका थिए ।
