देवी जिसी /जलजला, माघ-२५, जलजला गाउँपालिकाको केन्द्र लामाखेतमा नमुना युवा गाउँसभा अभ्यास तथा प्रशिक्षण कार्यक्रम सम्पन्न भएको छ । राष्ट्रिय युवा परिषद्को प्राविधिक सहयोगमा जलजला गाउँपालिकाले युवाहरुलाई नीति निर्माण गर्ने ठाउँ गाउँ, प्रदेश र प्रतिनिधीसभा सञ्चालनको प्रक्रीयाको बारेमा सैद्धान्तिक तथा व्यवहारिक ज्ञान सिप प्रदान गर्ने उद्देश्यले कार्यक्रम आयोजना गरेको हो ।
तीन दिनसम्म सञ्चालन भएको कार्यक्रममा गाउँपालिकाको ९ वटै वडाबाट चार/चार जनाको दरले युवाहरु सहभागी भएका थिए । प्रशिक्षण कार्यक्रममा प्रक्रियागत रुपमा नमुना युवा सांसद गठन समेत भएको छ, जसको अध्यक्षमा बैकुण्ठ जिसी, उपाध्यक्ष सुधा जिसी, र वडागत रुपमा सहभागी भएका प्रशिक्षार्थीहरु सदस्यका रुपमा चयन गरेको छ । यसरी गठन भएको समितिबाट प्रदेशमा हुने कार्यक्रमको लागी समेत सहभागी हुने बताइएको छ । तिन दिनसम्म संचालन भएको कार्यक्रममा आयुषा कडेल र देवराज अवस्थिले गाउँसभा बैठक आव्हान, कार्यसूचि तय, सभा शुरु, सञ्चालन र समापनका प्रक्रीया, बैठकमा प्रस्तुत हुने शैली र प्रयोग गर्ने भाषाको विषयमा सहजिकरण गर्नु भएको थियो । सैद्धान्तिकका साथसाथै सहभागीहरुलाइ गाउँसभाको अध्यक्ष र सदस्यहरुको रुपमा चयनगरि सभा सञ्चालनको नमुना अभ्यास गराइएको थियो ।
समापन कार्यक्रममा प्रमुख अतिथिको मन्तब्य ब्यक्त गर्नुहुदै जलजला गाउँपालिकाका अध्यक्ष राजुप्रसाद आचार्यले नमुना अभ्यासले युवा मार्फत समुदाय स्तरसम्म गाउँसभाको महत्व बुझाउन सहयोग पुगेको बताउनुभयो । उहाँले जिल्लामा एउटा पालिकाले मात्रै प्राप्त गर्ने यो अवसर जलजलाले प्राप्तगर्नु सौभाग्य भएको बताउनु भयो । नमुना युवा गाउँसभा अभ्यास तालिममा सिकेका कुरा भविष्यमा जो जहाँ पुगेपनि जिबनोपयोगी हुने र राजनैतिक रुपमा जुन दलसंग आबद्द भएपनि यसरी सिकेको सिप समाजको रुपान्तरणमा उपयोगी हुने बताउनुभयो ।
