म्याग्दीमा भदौ १२ गतेदेखि मतदाता नामावली अद्यावधिक गरिने

म्याग्दी, भदौ-७,  जिल्ला निर्वाचन कार्यालय म्याग्दीले यहि भदौ १२ गतेदेखि मतदाता नामावली अद्यावधिक गर्ने भएको छ । मंगलबार बेनीमा सरोकारवालाहरु संगको अन्तरक्रिया कार्यक्रम आयोजना गरि कार्यालयले भदौ १२ गतेदेखि १९ गते सम्म अद्यावधिक गर्ने मिति तय गरिएको जानकारी गराएको हो ।

कार्यक्रमका बारेमा जानकारी गराउँदै जिल्ला निर्वाचन अधिकारी भिम प्रसाद घिमिरेले भदौ १२ गते निर्वाचन कार्यालय, नगरपालिका, गाउँपालिका तथा वडा समेत मतदाता नामावलीको डिजिटल कपी प्रकाशित गरि अद्यावधिक गर्ने कार्य सुरु गरिने बताउनुभयो ।
आगामी मंसिर ४ गते हुने संघ तथा प्रदेशको निर्वाचनलाई लक्षित गरि गत साउन २० गते सम्म संकलन गरिएको मतदाता नामावलीमा भएका त्रुटीहरुलाई सच्याउनका लागि लागि एक साताको समय छुट्याईएको घिमिरेले बताउनुभयो ।

प्रकाशित नामावलीमा भएका कमजोरीलाई सच्याउनका लागि सम्वन्धीत मतदाता वा निजको घरपरिवारको सदस्यले वडा कार्यालयमा निवेदन दिन सक्नेछन । सो अवधिमा झुट्टा विवरण दिई मतदाता नामावलीमा नाम समावेश गरेको गराएको भए साको विरोधमा कुनै पनि मतदाताले दावि विरोधको उजुरी समेत दिन पाउने व्यवस्था रहेको निर्वाचन अधिकारी घिमिरेले बताउनुभयो ।

निर्धारित मितिमा मतदाताहरुलाई आफ्नो वडा कार्यालयमा गई मतदाता नामावलीमा रहेका आफ्नो नाम वा विवरणमा कुनै त्रुटि भएमा सच्याउन एवम् आफ्नो नाम दोहोरो परेको भए हटाउन निवेदन दिन, मृत्य भएका वा नागरिकता त्याग गरेका मतादाताको नाम हटाउन र बसाइ सरि तथा विवाह गरि अन्यत्र गएकाहरुले पनि निवेदन दिन जिल्ला निर्वाचन अधिकारी घिमिरेले जिल्लाका सम्पूर्ण मतदाताहरुलाई आग्रह गर्नुभएको छ ।

कार्यक्रमका प्रमुख अतिथि जिल्ला समन्वय समिति म्याग्दीका प्रमुख राज कुमार थापाले निर्वाचनलाई निष्पक्ष बनाउनका लागि मतादाता नामावली अद्यावधिकको कार्य महत्वूर्ण हुने बताउनुभयो । मतदाताहरुको यथार्थ विवरण ल्याउनका लागि यस अद्यावधिक कार्यमा वडा तथा पालिकाहरु संग समन्वय गर्न सवै राजनैतिक दलहरुलाई थापाले अनुरोध गर्नुभएको छ ।

साथै थापाले निर्वाचनलाई मर्यादित बनाउनका लागि मतदातालाई दवावमा राख्न नहुनेमा जोड दिनुभएको छ । उनिहरुले चाहेको दल वा उम्मेदवारलाई मतदिन पाउने अधिकारको हनन गर्न नहुने भन्दै थापाले यस विषयमा खास गरि राजनैतिक दलहरु नै संयमित हुनुपर्ने विचार व्यक्त गर्नुभयो ।

जिल्ला न्यायाधिश कृष्ण प्रसाद नेपालले जनताले शासक छनौट गर्ने र राज्य सत्ता स्थापना गर्ने महत्वपूर्ण आधार निर्वाचन भएको बताउनुभयो । निर्वाचनलाई शान्तीपूर्ण र धाँधलीरहित बनाउने सवैभन्दा वलियो पाटो मतदाता नामावलीलाई त्रृटिरहित बनाउनु हो, नेपालले भन्नुभयो ।
प्रमुख जिल्ला अधिकारी चिरञ्जीवि रानाले प्रजातन्त्र र सुशासनलाई सुनिस्चित गर्न देशमा निर्वाचनको महत्व हुने बताउनुभयो । प्रजिअ रानाले निर्वाचनमा मतदानका लागि कोही पनि नदोहोरिने र कोही पनि नछुट्ने गरि अद्यावधिकको कार्य सम्पादन गर्न वडा, पालिका तथा निर्वाचन कार्यालयलाई समेत निर्देश गर्नुभएको छ ।

कार्यक्रममा नेकपा एमालेका अध्यक्ष देवेन्द्र कटुवाल, नेपाली काँग्रेसका सचिव भरत रकाल, मंगोल नेश्नल अर्गनाईजेसनका अध्यक्ष डिके पुन लगायतले निर्वाचन संग सम्वन्धीत सवै गतिविधिहरुमा प्रविधिको प्रयोग गर्नुपर्ने कुरामा जोड दिएका थिए । साथै विदेशमा रहेका नेपालीहरु पनि निर्वाचनमा सहभागी हुने गरि व्यवस्था गर्नुपर्ने भनाई व्यक्त गरेका थिए ।

बेनी नगरपालिका प्रमुख, गाउँपालिकाका अध्यक्ष तथा उपाध्यक्ष, जिल्लाका विभिन्न सरकारी कार्यालयका प्रमुख, सुरक्षा निकाय, निजीक्षेत्र, संचारकर्मी लगायतको उपस्थिति रहेको कार्यक्रम प्रमुख जिल्ला अधिकारी रानाको अध्यक्षता, जिल्ला निर्वाचन अधिकारी घिमिरेको स्वागत र कार्यालयका नायव सुव्वा चित्रनाथ शर्माको संचालनमा सम्पन्न भएको थियो ।

-७,