देवी जिसी/म्याग्दी, असार-३०, सामाजिक विकास कार्यालय म्याग्दीले कार्यक्रम तथा योजनाहरुको बार्षिक समिक्षा गरेको छ । विहिवार कार्यालयले स्थानीय तहका जनप्रतिनिधि र सरोकारवालाहरुबिच आर्थिक बर्ष २०७८/०७९ मा सम्पादन गरेका कार्यहरु संगै सामाजिक क्षेत्रका समसामयिक सवालहरुको सन्दर्भमा अन्तरक्रिया एवम बार्षिक समिक्षा कार्यक्रम आयोजना गरेको हो । कार्यक्रममा कार्यालयबाट भएका गतिविधि र उपलब्धिहरुको बारेमा समेत जानकारी गराएको थियो । यस आर्थिक बर्षमा कार्यालयले कुल रु ३ करोड २१ लख ५८ हजार बजेटमध्ये रु २ करोड ६ हजार खर्च भएको जनाएको छ । कार्यालयले चालु तर्फ रु ६४ लाख ८१ हजार र पुंजिगततर्फ रु १ करोड ३५ लाख २५ हजार खर्च भएको जनाएको छ ।
सामाजिक बिकास कार्यालयका योजना अधिकृत बावुराम आचार्यले यसबर्ष २ वटा सामुदायिक भवन, ३ वटा आमा समुहको भवन निर्माण, ३ वटा मन्दीरको संरक्षण, ४ वटा विद्यालयमा घेरावार तथा प्रवेशद्धार निर्माण, १ वटा कृषि वस्तु संकलन केन्द्र, १ वटा धारा पोखरी निर्माण गरिएको जानाकारी दिनुभयो साथै उहाँले एक वटा वडा कार्यालय भवन निर्माण सुरु गरिएको समेत बताउनुभयो ।
यस बर्ष कार्यालयले गण्डकी समाज सभ्य समाज, ज्येष्ठ नागरिकमा रहेका ज्ञान, सीप र अनुभव अन्तरपुस्ता हस्तान्तरण, सामाजिक कुरीति विरुद्धको अभियान सञ्चालन, बालमैत्री स्थानीय शासन प्रवद्र्धन तथा व्यवस्थापन, जिल्ला बाल सञ्जाल गठन तथा परिचालन, अपांगता भएका व्यक्तिहरुलाई सहायता सामाग्री, युवा क्लबलाई खेलकुदका सामाग्री वितरण संगे विभिन्न जनचेतनामुलक अभियान सञ्चालन गरेको कार्यालय प्रमुख रमेश थापाले जानकारी दिनुभयो ।
जिल्ला समन्वय समितिका प्रमुख राजकुमार थापाले सामाजिक क्षेत्रको जागरणले समाजमा सकरात्मक परिवर्तन ल्याउन सकिने बताउँदै स्थानीय तह र सरोकारवाला निकायबीच समन्वय गर्दै आफ्ना कार्यक्रम र गतिविधिलाई थप प्रभाबकारी बनाउतर्फ लाग्न सुझाब दिनुभयो । कार्यक्रममा प्रमुख जिल्ला अधिकारी चिरञ्जिवि रानाले महिला, बालबालिका, ज्येष्ठ नागरिक र अपांगता भएका व्यक्तिहरुलाई राज्यका सेवा र सुविधाहरु सरल र सहज रुपमा उपलब्ध गराउनका लागि स्थानीय तहहरु र सम्बद्ध निकायहरुले ध्यान दिन आबश्यक रहेकोमा जोड दिनुभयो ।
कार्यक्रममा बेनी नगरपालिकाका उप प्रमुख ज्योति लामिछानेले सामाजिक परिवर्तन र रुपान्तरणका लागि समाजका सबै जिम्मेवार निकायहरुबिच समन्वयकारी भूमिका र हरेक नागरिकमा समाजप्रतिको जिम्मेवारी बोधको आबश्यकता औँल्याउनुभएको थियो । कार्यक्रममा सामाजिक विकास कार्यालयका प्रमुख थापाले सामाजिक विकासमा क्षेत्रगत भूमिकाको बारेमा सहजीकरण गर्नुभएको थियो । कार्यक्रममा बेनी अस्पतालका प्रमुख डाक्टर जितेन्द्र कँडेलले अस्पतालमा रहेको लैंगिक हिंसा सम्बन्धी एकद्धारा संकट व्यवस्थापन केन्द्र मार्फत भएका गतिविधिबारे जानकारी गराउनुभएको थियो
गैह्र सरकारी संस्था महासंघका अध्यक्ष दिपक पौडेलले सामाजिक क्षेत्रको अवस्था, अपांग संघका प्रतिनिधि सुरेन्द्र खत्रीले जिल्लामा अपांगताको अवस्था, दिलमायाँ बिटालुले जिल्लामा महिला सहकारीको अवस्थाबारेमा जानकारी गराउनुभएको थियो । कार्यक्रम लेखा अधिकृत त्रिविक्रम शर्माले स्वागत र योजना अधिकृत पौडेलको सञ्चालनमा सम्पन्न भएको थियो ।
