देवी जिसी /म्याग्दी, जेठ-२४, अखिल नेपाल महिला संघ म्याग्दीले आज (मंगलबार) म्याग्दी जिल्लाका जन प्रतिनिधिलाई स्वागत गरेको छ । अनेमसंघ म्याग्दीले नेकपा एमालेबाट बिजयी भएका म्याग्दी जिल्लाका सम्पूर्ण स्थानीय तहका महिला जन प्रतिनिधिहरुलाई बधाई, सम्मान तथा प्रशिक्षण कार्यक्रम गरेको हो ।
कार्यक्रममा प्रमुख अतिथि अखिल नेपाल महिला संघका केन्द्रीय सदस्य थमसरा पुनले प्रशिक्षण मुलक मन्तब्य ब्यक्तगर्दै महिलाको मन कोमल हुन्छ त्यसैले जनताका कामगर्दा कहिलेकाही कठोर निर्णयपनि गर्नुपर्ने हुदा बिचलित नभई काम गर्नुपर्ने बताउनुभयो ।
त्यसैगरी कार्यक्रममा नेकपा एमालेका उपाध्यक्ष बालकृष्ण सुबेदीले जनताका आवश्यकता पुरागर्ने पार्टी नै एमाले भएकोले नव निर्वाचित जनप्रतिनिधिहरुलाई आफ्नो भूमिका, काम कर्तब्यको बारेमा सचेत हुदै सबैलाई समेटेर अगाडी बढ्नु पर्ने बताउनुभयो ।
नेकपा एमालेका अध्यक्ष हरिकृष्ण श्रेष्ठले एमालेबाट जनप्रतिनिधिको रुपमा निर्वाचित भएपनि अव जनताको प्रतिनिधि भएकोले जनपक्षीय कामगर्न र सामाजिक रुपान्तरणको लागी बाहक बन्न आग्रह गर्नुभयो । कार्यक्रममा अखिल नेपाल महिला संघ म्याग्दीका इन्चार्ज प्रमुख खरमाया बिटालुले मन्तब्य ब्यक्तगर्दै पद पाउनु ठुलो कुरा नभएर पदको गरिमा जोगाएर कामगर्नु महत्वपुर्ण कुरा भएको कुरा बताउनुभएको थियो भने जनप्रतिनिधिको तर्फबाट सरस्वति उपाध्याय र गौमती चापागाईले शुभकामना मन्तब्य ब्यक्त गर्नु भएको थियो ।
कार्यक्रम अखिल नेपाल महिला संघ म्याग्दीका अध्यक्ष यसोधा रोकाको अध्यक्षता, अखिल नेपाल महिला संघका केन्द्रीय सदस्य थमसरा पुनको प्रमुख आतिथ्यता, उपाध्यक्ष पशुपति शाहीको स्वागत र सचिव विष्णु गुरुङ्गको संचालनमा सम्पन्न भएको हो ।
