म्याग्दी, जेठ-१९, पश्चिम म्याग्दीको मालिका गाउँपालिकाको हिँजो (बुधवार) सञ्चालित पहिलो तथा विशेष गाउँसभा स्थगित भएको छ । गाउँसभा चलिरहेको क्रममा सभा बहिष्कार गरेर बाहिर निस्कँदै गर्दा गाउँसभा सदस्य मञ्चमै पुगेर वडा अध्यक्षलाई जबरजस्ती तानेपछि गाउँसभा स्थगित गरिएको हो ।
मालिका–३, रुम डाँडागाउँका नेकपा माओवादीबाट निर्वाचित वडाध्यक्ष मोतिप्रसाद बुढालाई मालिका–४, आखेरबोटकी नेपाली कांग्रेसबाट निर्वाचित वडा महिला सदस्य भीमकुमारी पुनले बाहिर निस्कने क्रममा एक्कासी फ्लोरबाट मञ्चमै पुगेर तान्नुभएको थियो । उहाँले तानेपछि गाउँ कार्यपालिका सदस्यमा मनोनित दलबहादुर खड्काथोकी सहितका जनप्रतिनिधिले पनि तान्नुका साथै धकेल्दै बाहिर निकालेका थिए ।
यो दृश्य हेर्दा सभा चलिरहेको अवस्थामा बहिष्कार गर्ने पक्षले मञ्चमै पुगेर वडाध्यक्षलाई जबरजस्ती तान्नु उनीमाथि हातपात र दुव्र्यवहार भएको देखिएको थियो । अरु जनप्रतिनिधिको बलमा जबरजस्ती बाहिर निस्कनुपर्दा वडाध्यक्ष बुढाले आफूलाई दुव्र्यवहार र अपमान भएको बताउँदै यसका लागि आफूले कानुनी उपचार खोज्ने बताउनुभएको छ । यता गाउँपालिका अध्यक्ष बेगप्रसाद गर्बुजाले गाउँसभा चलिरहेको अवस्थामा वडाध्यक्षलाई केही जनप्रतिनिधि आएर मञ्चबाटै तानेर बाहिर लगेपछि गाउँसभा स्थगित गर्नुपरेको बताउनुभयो ।
गाउँसभा चलिरहेको अवस्थामा सभा बहिष्कार गरेर बाहिर जाने क्रममा यसरी गाउँसभा सदस्य मञ्चमै पुगेर वडाध्यक्षलाई जबरजस्ती रुपमा तान्नु सभाको मर्यादा विपरीतको कार्य हो । पालिकाको गाउँसभालाई मिनी संसद रुपमा मानिन्छ । गाउँसभामा विषयगत समितिको संयोजक प्रस्ताव गरिएकोमा नेपाली कांग्रेसले संयोजक नपाएपछि असहमति जनाउँदै विवाद सुरु भएको थियो ।
यसअघि गाउँसभामा गाउँपालिका अध्यक्ष बेगप्रसाद गर्बुजाले प्रस्ताव गरेको मालिका गाउँपालिका, गाउँ कार्यपालिका, कार्यसम्पादन नियमावली–२०७९ र प्रशासकीय कार्यविधि (नियमित गर्ने) ऐन–२०७९ भने पारित भएको छ । यी दुईवटा प्रस्तावहरु सभामा पेश भई निणायार्थ प्रस्तुत भएर पारित भए पनि गाउँपालिकाको विषयगत समिति गठनसम्बन्धी प्रस्तावमाथि छलफल गर्ने क्रममा विवाद भएको थियो । विषयगत समिति गठन गर्ने प्रस्तावमा चित्त नबुझेपछि नेपाली कांग्रेस, नेकपा माओवादी र समाजवादीबाट निर्वाचित जनप्रतिनिधिले असहमति जनाएका थिए ।
उनीहरुले गाउँपालिका अध्यक्षले आफूखुसी विषयगत समितिको संयोजक प्रस्ताव एकलौटी रुपमा गरेको भन्दै आरोप लगाएका छन् । गाउँपालिका अध्यक्ष गर्बुजाले भने आफूले संविधानले दिएको अधिकार प्रयोग गरेर विषयगत समितिको संयोजक प्रस्ताव गरेको बताउनुभयो । रुम डाँडागाउँका वडाध्यक्ष बुढालाई पालिका अध्यक्ष गर्बुजाले भौतिक पूर्वाधार समितिको संयोजक प्रस्ताव गरेर हलबाट पारित भएपछि निस्कोटका वडाध्यक्ष टंकप्रसाद पुनले माओवादीलाई यही भए पुग्छ भन्दै निस्कने क्रममा महिला सदस्य पुन मञ्चमा गएर अध्यक्ष बुढालाई दुव्र्यवहार गर्नुभएको थियो ।
