म्याग्दीमा आगो निभाउने क्रममा जलेर एकजनाको ज्यान गयो, एकजना गम्भीर घाइते

म्याग्दी, फागुन-२४, म्याग्दीको मालिकामा आगोले जलेर एक जनाको ज्यानगएको छ भने एकजना गम्भीर घाइते भएका छन् । जिल्लाको मालिका गाउँपालिका वडा नं ५ को भिरखर्क  सामादुयिक बनमा लागेको आगो निभाउने क्रममा मंगलबार दिउसो एक जनाको जलेर मृत्यु भएको हो ।मृत्यु हुनेमा २६ बर्षीय मबहादुर बोहोरा रहेको जिल्ला प्रहरी कार्यालयले जनाएको छ ।उनको घटना स्थलमै मृत्यु भएको हो ।

त्यस्तै घाइते हुनेमा मृतकका भाइ २१ बर्षका मन बहादुर बोहोरा रहेका छन् । गम्भीर घाइते मानबहादुरलाई उपचारको लागी हेलिकोप्टर मार्फत पोखरा पुर्याइएको जिल्ला प्रहरी कार्यालय म्याग्दीका प्रहरी निरीक्षक तथा सुचना अधिकारी  बिरेन्द्रराज गुरुंगले बताउनुभयो । मृतकको शब पोष्टमार्टमको लागी बेनी अस्पाताल ल्याउने तयारी  भैरहेको गुरुंगले  जानाकारी दिनुभयो ।

भिरखर्कको जंगलमा सोमबार रातिदेखि आगो लागेको र अहिले सम्म नियन्त्रणमा आउन सकेको छैन । जंगलमा लागेको आगो बस्तीमा आउन थालेपछि आगो निभाउने क्रममा घटना भएको हो । फागुन महिना शुरु भएसंगै तापक्रम बढेको र हावा हुरीको मौसम समेत रहेकोले यो समयमा आगलागीका घटना हुने गर्दछन ।