पर्वत, कार्तिक-२, अन्तराष्ट्रिय पर्वत समाजको तेस्रो महाधिबेसनको तयारी सम्बन्धमा कुश्मा बजारमा पत्रकार सम्मेलन गरी त्यस सम्बन्धमा जानकारी गराइएको छ। समाजको आयोजना तथा नेपाल पत्रकार महासंघ जिल्ला शाखा पर्वतको समन्वयमा आयोजना गरिएको पत्रकार सम्मेलनमा यही कात्तिक ४ र ५ गते गर्न लागिएको महाधिबेसनको तयारी र समाजले राखेका लक्ष्यका बारेमा जानकारी दिइएको हो। कार्यक्रम जिल्लाको मोदी गाउँपालिका–८ चित्रेमा आयोजना हुदैछ
कार्यक्रममा बोल्दै समाजका अध्यक्ष पुरन गिरीले कोभिड संक्रमणको जोखिमका कारण दुई वर्षदेखि बन्द रहेको सामुदायिक होमस्टेको प्रबद्र्धनको लागि महाधिबेसन चित्रेमा गर्न लागिएको बताउनुभयो । पर्वत घर भई विभिन्न देशमा रहेका नेपालीहरुलाई समन्वय गर्न चार वर्ष अघि संस्था स्थापना भएको हो । अबको महाधिबेसनबाट बन्ने नयाँ समितिले पर्वतको समुन्नतिको लागि यहाँका सम्भावनामा सहकार्य गर्न गर्न आफूहरु लालयित भएको पनि गिरीले बताउनुभयो ।
समाजका महासचिव गुणराज शर्माले आफूहरु संस्थागत रुपमा बामे सर्दै गरेको अवस्थामा रहेकाले अहिलेसम्मको अवस्थामा धेरै काम गर्न नसकेको भए पनि अब भने लगानी देखि सहकार्यमा काम गर्ने बताउनुभयो । समाजमा रहेको विशेषतः लगानीको क्षेत्रमा बढी जानकार रहेका संस्थाका संरक्षक सुवास जोशीले चार वर्ष पहिले प्रवासमा रहेका पर्वतेहरु एकजुट भएर समाजको स्थापना गरिएको बताउँदै विदेशको सिप र पुँजीलाई मातृ जिल्लामा प्रयोग गर्न सक्नु आफूहरुको उद्धेश्य रहेको स्पष्ट पर्नुभयो ।
विभिन्न समस्यामा रहेका जिल्लाबासीहरुलाई सहयोग गर्दै आइरहेको सम्झना गर्दै उनले आफूहरु जिल्लासंग भावनात्मक रुपमा समेत नजिक रहेको बताए। सपनामा पनि गृह जिल्लाकै प्रगति र समुन्नितको कुरा देखिने गरेको बताउँदै जोशीले लगानीको बारेमा आवश्यक चासो र अध्ययन पर्वत समाजको तर्फबाट भइरहेको उल्लेख गर्नुभयो ।
महाधिबेसनको तयारीको बारेमा जानकारी दिँदै समाजकी नेपाल प्रतिनिधि मुना भुसालले महाधिबेसनको लागि विभिन्न उपसमितिहरु निर्माण गरेर आवश्यक तयारी करिब पूरा भएको जानकारी दिनुभयो । कार्यक्रम स्थलसम्म पुग्नको लागि यातायात, खाना र बस्नको व्यवस्थापन लगायतका कामहरु पनि पूरा भएको बताउँदै उहाँले चित्रेमा गरिएको महाधिबेसनले पर्यटनको क्षेत्रमा नयाँ उत्साह थप्ने अपेक्षा रहेको उल्लेख गर्नुभयो ।
कार्यक्रममा अन्तराष्ट्रिय पर्वत समाजका उपाध्यक्ष झलक के.सी, नेपाल पत्रकार महासंघ पर्वतका अध्यक्ष सन्तोष थापा, सचिव राजबाबु पि.सी, पूर्व अध्यक्ष ओमप्रसाद घायल, पत्रकार अगन्धर तिवारी, बैकुण्ठ गिरी लगायतले जिल्लामा गर्न सक्ने लगानी, भावी, कार्यदिशा लगायतका बारेमा जिज्ञासा र सुझाव समेत राखेका थिए। कार्यक्रम समाजका अध्यक्ष पुरन गिरीको अध्यक्षतामा उपाध्यक्ष परशुराम पौडेलको स्वागत र महासचिव गुणराज शर्माको संचालनमा सम्पन्न भएको थियो ।
