२७ भाद्र २०७८, आइतबार
प्रताप बानियाँ, म्याग्दी ।
म्याग्दीको सदरमुकाम बेनीमा आइतबारदेखि बृहत पोषण विशेष कार्यक्रमसम्बन्धी प्रशिक्षक प्रशिक्षण तालिम सुरु भएको छ । स्वास्थ्य कार्यालय म्याग्दीको आयोजना र मिलन म्याग्दीद्वारा सञ्चालित सुआहारा कार्यक्रमको प्राविधिक सहयोगमा तालिम सञ्चालन गरिएको हो ।
तालिमको उद्घाटन गर्दै जिल्ला समन्वय समिति म्याग्दीका प्रमुख देवेन्द्रबहादुर केसीले तालिममा सक्रियतापूर्वक सहभागी भई आगामी दिनमा कुशल प्रशिक्षक बन्न सहभागीहरुलाई सुझाव दिनुभयो । उहाँले अहिलेको अवस्थामा स्वास्थ्य क्षेत्र कति संवेदनशील रहेछ भन्ने विषय स्वास्थ्यको क्षेत्रभन्दा बाहिर रहेकाले पनि राम्रोसँग बुझेको बताउँदै पछिल्लो समय स्वास्थ्य क्षेत्रको संवेदनशीलता र महत्व बढ्दै गएको बताउनुभएको छ ।
म्याग्दीका प्रमुख जिल्ला अधिकारी गणेशबहादुर अधिकारीले अहिले विश्व समुदाय कोरोना महामारीको दोस्रो लहरबाट गुज्रिरहेको र तेस्रो लहरको संघारमा रहेकाले यसबाट जोगिन तथा जोगाउँदै खोप पनि सञ्चालन गर्नुपर्ने अभियानमा रहेको बताउनुभयो । उहाँले गरिबीको मुख्य सूचक कुपोषण रहेकाले कुपोषण नभएको समाज एडभान्स समाज रहेको भन्ँदै तालिमलाई भरपुर रुपमा उपयोग गरी समुदायस्तरमा पुगेर स्वास्थ्यसम्बन्धी सचेतना फैलाउनुपर्नेमा जोड दिनुभएको छ ।
स्वास्थ्य कार्यालय म्याग्दीका प्रमुख एकनारायण लम्सालले चालु आर्थिक वर्षमा सञ्चालित कार्यक्रमलाई समुदायमा छिटो लैजानका लागि तालिम आयोजना गरिएको जानकारी दिँदै गरिबीको मुख्य कारण कुपोषण भएकाले यसलाई हटाउनुपर्ने बताउनुभयो । आगामी ७ दिनसम्म चल्ने तालिममा जिल्लाको ६ वटा स्थानीय तहको स्वास्थ्य शाखाबाट २ जनाका दरले सहभागिता रहेको छ ।
पोषणसम्बन्धी बृहत विषयवस्तुहरुको एकीकृत प्याकेजका तालिम सञ्चालन गर्न आवश्यक पर्ने ज्ञान, सिप तथा व्यवस्थापकीय पक्षको क्षमता अभिवृद्धि गर्ने, पोषणसम्बन्धी व्यवहार सुधारका लागि परामर्श र छलफल विधिद्वारा ज्ञान, सिप एवं धारणामा सकारात्मक परिवर्तन गर्न र कुपोषण व्यवस्थापनको लागि प्राविधिक तथा परामर्शसम्बद्ध ज्ञान, सिप र क्षमताको विकास गर्ने उद्देश्य राखिएको आयोजकले जनाएको छ ।
तालिम अवधिभरमा राष्ट्रिय पोषण नीति तथा रणनीति, बहुक्षेत्रीय पोषण योजना र महत्व, खाद्य विविधिकरण र स्थानीय खानेकुराको महत्व, किशोरावस्थाको पोषण, मातृ पोषण, पुरक वा थप खाना, बहु सुक्ष्म पोषक तत्वहरु, वृद्धि अनुगमन तथा महत्व, बाल संरक्षण अनुदान र शिशु तथा बाल्यकालीन पोषण बीचको सम्बन्ध, बिरामी बालबालिकाहरुको खाना र हेरचाह, शीघ्र कुपोषणको एकीकृत व्यवस्थापनका विषयमा सहजीकरण गरिनेछ ।
यसैगरी बहिरङ्ग सेवाको परिचय, सिबिआईएम एनसिआई अनुसार स्वास्थ्य लेखाजोखा, शीघ्र कुपोषण पत्ता लगाउन पोषणको लेखाजोखा, प्रणालीबद्ध औषधीबाट उपचार, अन्तरङ्ग सेवाको परिचय र उपचार पद्धति, गर्भवती तथा सुत्केरी महिलामा हुने शीघ्र कुपोषण व्यवस्थापन, पोषणमैत्री स्वास्थ्य संस्था तथा स्थानीय शासनको अवधारणा र आपूर्ति व्यवस्थापन सूचना प्रणाली लगायतका विषयहरुमा सहजीकरण गरिने जनाइएको छ ।
तालिमको स्वास्थ्य कार्यालय प्रमुख एकनारायण लम्साल, सुआहारा कार्यक्रम बागलुङ–म्याग्दीका वरिष्ठ कार्यक्रम संयोजक राजेन्द्र अधिकारी, सुआहारा कार्यक्रमका पोषण तथा स्वास्थ्य अधिकृत रुबी जोशी, रामचन्द्र पन्थी, मिरा बम र सुआहारा म्याग्दीका फिल्ड संयोजक बालकुमारी पुनले सहजीकरण गर्नुहुनेछ । तालिमको उद्घाटसत्र स्वास्थ्य कार्यालय प्रमुख लम्सालको अध्यक्षता, परिवार नियोजन सुपरभाइजर गणेश सुवेदीको सञ्चालन र सिअहेव सोमनाथ उपाध्यायको स्वागतमा सम्पन्न भएको थियो ।
