तिलु शर्मा पौडेल, दोहा कतार ।
कतारमा रहेका प्रवासी म्याग्देलीहरुको साझा संस्था म्याग्दी प्रवासी नेपाली सङ्घ (मोना) कतारले जिल्लामा अन्तर मावि स्तरीय वक्तृत्वकला प्रतियोगिता आयोजना गर्ने भएको छ। कोरोनाका कारण अनलाइन माध्यमबाट प्रतियोगिता आयोजना गर्न लागिएको मोना कतारले जनाएको छ।
सामाजिक संस्था भए पनि स्थापना कालदेखि नै जिल्ला तथा प्रवास कतारमा समेत हरेक गतिविधिमा अग्रणी भूमिकामा रहने गरेको सङ्घद्वारा जारी सूचनामा प्रतियाेगिता बारे जनाइएको छ । कतारमा समेत विविध गतिविधि सञ्चालन गर्दै गर्दै आएको सङ्घले पछिल्लो केही समयदेखि कोरोना महामारीले उत्पन्न गरेको विषम परिस्थितिका वावजुद समाजका हरेक तह र तप्कासम्म पुग्न प्रतियोगिताले मद्दत गर्ने विश्वास लिएको सङ्घका अध्यक्ष नरेन्द्र फगामीले जानकारी दिनु भयो।फगामीका अनुसार सङ्घले संस्थाका सल्लाहकार थम कुमार गिरीको संयोजकत्वमा ९ सदस्यीय वक्तृत्वकला प्रतियोगिता आयोजक समिति गठन गरेको छ ।
वर्तमान कार्यसमितिले फरक अवधारणाका साथ अगाडी बढ्न खोजेको हुँदा संस्थाको रोजाइमा भविष्यका कर्णधार समेत मानिने (विद्यार्थी ) हरू परेको र उनीहरूमा लुकेको प्रतिभालाई प्रस्फुटन गर्ने उद्देश्यले आगामी ५ भदौ २०७८ देखि चार चरणमा सम्पन्न हुने गरी म्याग्दी जिल्ला भरिका माध्यमिक विद्यालय स्तरीय खुल्ला वक्तृत्वकला प्रतियोगिता अनलाइनका माध्यमबाट आयोजना गर्न लागेको र तयारी अन्तिम चरणमा पुगेको संयोजक गिरीले जानकारी दिनु भयो ।
गिरीले आयोजकले प्रतियोगिताका लागि गुगल फर्म र इमेल जारी गरिसकेको बताउँदै प्रतियोगिता सम्बन्धी नियम तथा कार्यतालिका, गुगल फर्म र इमेल म्याग्दी जिल्लाभरका गाउँपालिका, नगरपालिका तथा विद्यालयहरूलाई इमेलद्वारा नै पठाई सकिएको बताउनु भयो । उहाँले गाउँपालिका तथा नगरपालिकालाई आफ्नो पालिका भित्रका सम्पूर्ण विद्यालयमा सूचना सम्प्रेषण गरी सहभागी पठाउन समन्वय गरिदिन अनुरोध समेत गर्नु भएको छ।
आयोजक समितिले प्रतियोगिताको लागि निर्णायक मण्डल समेत गठन गरेको छ । निर्णायकहरूमा घनश्याम खड्का, रेखा कौसल रेग्मी, हरि प्रसाद सुबेदी, थम कुमार गिरि र विक्रम कार्की रहनु भएको छ । कार्की र गिरी कतारमा कार्यरत हुनुहुन्छ भने बाँकी सबै जिल्लाका प्रतिष्ठित व्यक्तित्वहरू हुनुहुन्छ । प्रतियोगिता ३ चरणसम्म भर्चुअल र फाइनल म्याग्दी सदरमुकाम बेनीमा प्रत्यक्ष गर्ने कार्य तालिका रहेको छ ।
पहिलो चरणमा “कोरोना महामारी, यसले विभिन्न क्षेत्रमा पारेका प्रभाव र निराकरणका उपाय” का बारेमा ५ मिनेट नबढाइ असम्पादित र मोबाइलबाट तेर्सो (ल्याण्डस्केप) गरी खिचिएको भिडियो भदौ १४ गते साँझ ५ बजेभित्र आयोजकले उपलब्ध गराएको गुगल फर्म या इमेलमा पठाउन सहभागीलाई अनुरोध गरेको छ ।
भिडियो रेकर्ड गर्दा क्यामेरा बाहेक दायाँबायाँ तल माथि कहीँ हेरेमा वा कहीँ पढेको या साभार गरिएको जस्तो देखिएमा निणायकले नम्बर काट्न सक्ने आयोजक मोना कतारले जनाएको छ ।
