कुश्माको चुवाको पहिरोले हिजो राती देखि अबरुद्ध पोखरा बागलुङ सडक खण्ड अझै खुलेन

पर्वत, असार-१५,  बर्षाका कारण पहिरो जाँदा मध्यपहाडी लोकमार्गको पर्वत–बागलुङ सडक खण्ड अवरुद्ध बनेको छ । पर्वतको कुश्मा नगरपालिका वडा नं ८ चुवाभिरमा झरेको पहिरोका  कारण (हिजो) सोमबार रातीदेखि नै सडक अबरुद्ध बनेको हो । उक्त स्थानमा सडक भन्दा करिव ५० मिटरमाथिबाट ठूलो पहिरो झरिरहेकाले अहिले सडक अबरुद्ध बनेको छ ।

सडकको दुवै तर्फबाट हटाउने प्रयास भइरहेपनि सडक खुल्न मंगलबार दिउँसो बेलुका सम्म लाग्न सक्ने जिल्ला प्रहरी कार्यालय पर्वतका प्रहरी नायव उपरिक्षक विश्वराज अधिकारीले बताउनुभयो । उक्त स्थानमा विगत देखिनै सामान्य वर्षा हुने वित्तिकै पटक पटक सडक अवरुद्ध हुने गरेको छ ।

सडक अबरुद्ध बनेपछि विभिन्न मालबहाक ढुवानीका सवारी साधन सँगै एम्बुलेन्स सेवा समेत प्रभावित बनेको छ । कोरोना कहरको महामारीमा सडक बन्द भएपछि बागलुङ, म्याग्दी, मुस्ताङ लगायतका स्थानबाट थप उपचारका लागि पोखरा लैजानुनपर्ने विरामीहरु प्रभावित बनेका छन् भने अत्यावश्यक कामका लागि आवातजावत गर्ने सर्वसाधारणहरु पनि मर्कामा परेका छन् ।

सडक अवरुद्ध हुँदा साविक धौलागिरिका बागलुङ, म्याग्दी र मुस्ताङका लागि आएका सवारी साधनहरु पर्वतको नयाँपुलमा अलपत्र बनेका छन् भने ती जिल्लाबाट पोखरा, काठमाण्डौका लागि छुटेका सवारीसाधनहरु पनि गन्तब्यमा पुग्न सकेका छैनन् । सडक सडकमा पहिरो आएपछि विद्युत पोल भाँच्चिदा सोमबार राति देखि अबरुद्ध बनेको धौलागिरिका बागलुङ, म्याग्दी र पर्वतमा वितरण गरिएको विद्युत लाइन समेत ठूलो प्रयास पछि मंगलबार विहान ११ बजे मात्रै सुचारु भएको थियो  । न्युज डबलिको सहयोगमा