पर्वत, बैशाख-२९, गण्डकी प्रदेश मुख्यमन्त्रीमा पृथ्वीसुब्बा गुरुङले दोस्रो पटक सपथ लिनु भएको छ । ठूलो दलको हैसियतमा एमाले संसदीय दलका नेता गुरुङलाई प्रदेश प्रमुख सीताकुमारी पौडेलले सपथ खुवाउनु भएको हो । प्रदेश प्रमुख पौडेलले संविधानको धारा १६८ को ३ बमोजिम नियुक्त गरी बुधबार साँझ आफ्नै निवासमा गुरुङलाई पद तथा गोपनियताको सपथ खुवाउनु भएको हो ।
मुख्यमन्त्री गुरुङ अहिले कोभिड संक्रमित भएका कारण सपथग्रहणमा निकै कम मात्रलाई बस्न दिइएकोले प्रदेश प्रमुखकाे निवासमा आयाेजित सपथ ग्रहण समाराेहमा गुरुङले एक्लै सपथ लिनु भएको हो । सभामुख नेत्रनाथ अधिकारी, उपसभामुख सृजना शर्मा, एमाले संसदीय दलका सचेतक मायानाथ अधिकारी, उच्च अदालतका प्रमुख न्यायाधिश सपथ ग्रहण समाराेहमा उपस्थित हुनुहुन्थ्यो । अहिले निवास वरपर कडा सुरक्षा व्यवस्था गरिएको छ ।
माओवादीले सरकारको साथ छाडेपछि २ मन्त्रालय खाली रहेका र मुख्यमन्त्री गुरुङले कृषि मन्त्रालय पनि आफैंले सम्हाल्दै आउनु भएको थियो । भौतिक पूर्वाधार र कानुन मन्त्रालय रामशरण बस्नेतको जिम्मेवारीमा थियो ।
पयर्टन मन्त्रालयमा विकास लम्साल, सामाजिक विकास मन्त्रालयमा नरदेवी पुन हुनुहुन्थ्यो भने अविश्वासको प्रस्ताव टरेको भोलिपल्ट वैशाख १६ गते उक्त मन्त्रालय टुक्रयार बनाएको युवा तथा खेलकुद मन्त्रालयमा राजीव गुरुङ ९दीपक मनाङेलाई नियुक्त गरिएको थियो ।
अब नयाँ क्याबिनेटमा कसले निरन्तरता पाउँछन् वा पूरानै जिम्मेवारी सुम्पिएलान् केहि दिनपछि नै थाहा हुनेछ । ३० दिनभित्र विश्वासको मत लिनुपर्ने चटारोले पनि फेरबदल हुने सम्भावना छैन ।
काँग्रेस, माओवादी, जसपा र राजमो गठबन्धनबाट कांग्रेसका कृष्णचन्द्र नेपालीले बुधबार दाबी निवेदन पेस गर्नुभएको थियो । एमालेबाहेक सबै एकातिर उभिँदा टुप्लुक्क बहुमत ३१ मत पुग्ने थियो । तर राष्ट्रिय जनमोर्चाको तर्फबाट एकजनाको हस्ताक्षर भएन । समर्थन भनिए पनि बहुमत सांसदको हस्ताक्षर नहुँदा काँग्रेसका कृष्णचन्द्र नेपालीको मुख्यमन्त्री बन्ने सपना तुहिएको हो ।
राजमोका सांसद कृष्ण थापाले आफ्नो विमति रहेको भन्ने पत्र दर्ता गरेपछि प्रदेश प्रमुखले पुनः एमालेलाई नै सरकार गठनका लागि आह्वान गर्नुभएको हो । बहुमतको सरकार गठन गर्ने प्रतिपक्षी दलहरुको प्रयास असफल भएसँगै विद्यमान ठूलो दलको संसदीय दलको नेताको हैसियतमा पृथ्वीसुब्बा गुरुङले नै मुख्यमन्त्री को रुपमा नियुक्त हुदै सपथ लिनुभएको हो ।
